കർണാടകയിലെ ഹാസൻ ജില്ലയിലുള്ള പ്രസിദ്ധമായ ഹാസനാംബ ക്ഷേത്രത്തിൽ ഉപമുഖ്യമന്ത്രി ഡി.കെ. ശിവകുമാറിന്റെ വി.ഐ.പി ദർശനത്തെ തുടർന്ന് ഭക്തരുടെ കടുത്ത പ്രതിഷേധം. ദർശനത്തിനായി മണിക്കൂറുകളോളം വരിനിന്ന സാധാരണ ഭക്തരെ തടഞ്ഞുവെച്ചതാണ് പ്രതിഷേധത്തിന് കാരണമായത്. ശിവകുമാർ ഭാര്യ ഉഷാ ശിവകുമാർ, ഹാസൻ ജില്ലാ ചുമതലയുള്ള മന്ത്രി കെ.എം. ശിവലിംഗേഗൗഡ, എം.പി ശ്രേയസ് പട്ടേൽ എന്നിവർക്കൊപ്പം പ്രത്യേക പൂജകൾ നടത്തുന്നതിന്റെ തത്സമയ ദൃശ്യങ്ങൾ ക്ഷേത്ര വളപ്പിലെ എൽ.ഇ.ഡി സ്ക്രീനിൽ പ്രദർശിപ്പിച്ചിരുന്നു. ഇത് കണ്ട് രോഷാകുലരായ ഭക്തർ സ്ക്രീനിലേക്ക് ചെരുപ്പുകൾ എറിയുകയായിരുന്നു.
സാധാരണക്കാർക്ക് ദർശനം തടസ്സപ്പെടുത്തി വി.ഐ.പികൾക്ക് മാത്രം പ്രത്യേക പരിഗണന നൽകുന്നതിൽ പ്രതിഷേധിച്ചാണ് ഭക്തർ രംഗത്തെത്തിയത്. ക്യൂവിൽ നിന്ന നിരവധി വനിതാ ഭക്തർ ഭരണകൂടത്തിന്റെ വി.ഐ.പി സംസ്കാരത്തിനെതിരെ പരസ്യമായി ചോദ്യങ്ങളുയർത്തി. ഇതിന് പിന്നാലെയാണ് ചിലർ കാൽപ്പാദങ്ങളിൽ നിന്ന് ചെരുപ്പൂരി ദൃശ്യങ്ങൾ തെളിഞ്ഞ വലിയ സ്ക്രീനിലേക്ക് എറിഞ്ഞത്. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ വിഷയം വലിയ രാഷ്ട്രീയ വിവാദമായി മാറിയിട്ടുണ്ട്.
സംഭവത്തിൽ കോൺഗ്രസ് സർക്കാരിനെതിരെ രൂക്ഷവിമർശനവുമായി പ്രതിപക്ഷമായ ബി.ജെ.പി രംഗത്തെത്തി. സ്ക്രീനിൽ കണ്ടപ്പോൾ തന്നെ ജനങ്ങളുടെ പ്രതികരണം ഇതാണെങ്കിൽ നേരിട്ട് കണ്ടാൽ എന്താകുമായിരുന്നു എന്ന് ബി.ജെ.പി സോഷ്യൽ മീഡിയ പോസ്റ്റിൽ പരിഹസിച്ചു. പ്രധാന ക്ഷേത്ര ഉത്സവങ്ങളിൽ വി.ഐ.പി ദർശനം അനുവദിക്കുന്നതും ജനത്തിരക്ക് നിയന്ത്രിക്കുന്നതിലുണ്ടാകുന്ന വീഴ്ചകളും വലിയ ചർച്ചകൾക്കാണ് വഴിവെച്ചിരിക്കുന്നത്.
