1990-ൽ അയോധ്യയിലേക്ക് മാർച്ച് ചെയ്ത കർസേവകർക്ക് നേരെ അന്നത്തെ ഉത്തർപ്രദേശ് മുഖ്യമന്ത്രി മുലായം സിംഗ് യാദവ് വെടിവെപ്പിന് ഉത്തരവിട്ടത് ഇന്ത്യൻ ഭരണഘടന സംരക്ഷിക്കാനും രാജ്യത്ത് വലിയൊരു ആഭ്യന്തരയുദ്ധം ഒഴിവാക്കാനുമാണെന്ന് സമാജ്‌വാദി പാർട്ടി എം.പി സനാതൻ പാണ്ഡെ. സമാജ്‌വാദി പാർട്ടി അധ്യക്ഷൻ അഖിലേഷ് യാദവ് അയോധ്യയിലെ രാമക്ഷേത്ര സന്ദർശനത്തിന് ഒരുങ്ങുന്നതിനിടെ, കർസേവകർ കൊല്ലപ്പെട്ട സംഭവത്തിൽ മാപ്പുപറയണമെന്ന് മുഖ്യമന്ത്രി യോഗി ആദിത്യനാഥ് ആവശ്യപ്പെട്ടതിന് പിന്നാലെയാണ് സമാജ്‌വാദി പാർട്ടിയുടെ ഈ കടുത്ത തിരിച്ചടി.
കഴിഞ്ഞ 35 വർഷമായി 1990-ലെ സംഭവം രാഷ്ട്രീയവത്കരിച്ച് ബി.ജെ.പി ജനങ്ങളെ തെറ്റിദ്ധരിപ്പിക്കുകയാണെന്ന് മാധ്യമങ്ങളോട് സംസാരിക്കവെ ബല്ലിയയിൽ നിന്നുള്ള എം.പി സനാതൻ പാണ്ഡെ ആരോപിച്ചു. “രാജ്യത്ത് തർക്കമന്ദിരം സംരക്ഷിക്കാൻ കോടതി ഉത്തരവുണ്ടായിരുന്ന സമയമാണത്. അന്ന് ക്രമസമാധാനം പാലിക്കേണ്ട ചുമതല കേന്ദ്ര സർക്കാരിനും പ്രാദേശിക ഭരണകൂടത്തിനുമായിരുന്നു. തർക്കസ്ഥലത്തേക്ക് ആളുകൾ എത്താതിരിക്കാൻ വെടിവെപ്പ് ഉത്തരവിട്ടില്ലായിരുന്നുവെങ്കിൽ അവിടെ വലിയ അക്രമങ്ങൾ നടക്കുകയും അത് രാജ്യത്തുടനീളം വൻ വർഗീയ കലാപത്തിനും ആഭ്യന്തരയുദ്ധത്തിനും വഴിതുറക്കുകയും ചെയ്യുമായിരുന്നു. അതിനാൽ ഭരണഘടന ഉറപ്പുനൽകുന്ന ക്രമസമാധാനം പാലിക്കാൻ മുലായം സിംഗ് യാദവ് എടുത്ത തീരുമാനം തികച്ചും ശരിയായിരുന്നു,” സനാതൻ പാണ്ഡെ വ്യക്തമാക്കി.
അതേസമയം, സമാജ്‌വാദി പാർട്ടി എം.പിയുടെ പ്രസ്താവനയ്ക്കെതിരെ ബി.ജെ.പി കടുത്ത പ്രതിഷേധവുമായി രംഗത്തെത്തിയിട്ടുണ്ട്. എസ്.പി നേതാക്കളുടെ പ്രസ്താവന അവരുടെ ഹിന്ദുവിരുദ്ധ, രാമവിരുദ്ധ മനോഭാവമാണ് വ്യക്തമാക്കുന്നതെന്നും വോട്ട് ബാങ്ക് പ്രീണന രാഷ്ട്രീയമാണ് ഇതിന് പിന്നിലെന്നും ബി.ജെ.പി കേന്ദ്രങ്ങൾ ആരോപിച്ചു. ഉത്തർപ്രദേശ് നിയമസഭാ തിരഞ്ഞെടുപ്പിന് കളം ഒരുങ്ങുന്നതിനിടെ 1990-ലെ കർസേവകർക്ക് നേരെയുള്ള വെടിവെപ്പ് സംഭവം വീണ്ടും ദേശീയ രാഷ്ട്രീയത്തിൽ വലിയ തർക്കവിഷയമായി ഉയരുകയാണ്.
