വാഷിംഗ്ടൺ: ലോകത്തിലെ ഏറ്റവും മൂല്യമുള്ള ടെക് കമ്പനിയായ എൻവിഡിയയുടെ (Nvidia) സ്ഥാപകനും സി.ഇ.ഒയുമായ ജെൻസൻ ഹുവാങ് ചൈനീസ് ചാരസംശയമുള്ള ആലീസ് ഹുവാങ്ങുമായി പുലർത്തിയിരുന്ന അടുത്ത ബന്ധത്തെക്കുറിച്ച് യു.എസ് ട്രംപ് ഭരണകൂടത്തിന് മാസങ്ങൾക്ക് മുമ്പേ മുന്നറിയിപ്പ് ലഭിച്ചിരുന്നതായി വിദേശ മാധ്യമങ്ങളുടെ ഞെട്ടിക്കുന്ന വെളിപ്പെടുത്തൽ. യു.എസ് വിദേശകാര്യ സെക്രട്ടറി മാർക്കോ റൂബിയോയുടെ നേതൃത്വത്തിൽ തയാറാക്കിയ അതീവ രഹസ്യ മെമ്മോയാണ് (Classified Memo) കഴിഞ്ഞ വസന്തകാലത്ത് ട്രംപ് ഭരണകൂടത്തിന്റെ ഉന്നത ഉദ്യോഗസ്ഥർക്ക് കൈമാറിയിരുന്നതെന്ന് ന്യൂയോർക്ക് ടൈംസ് ഉൾപ്പെടെയുള്ള അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു.
ചൈനീസ് രഹസ്യാന്വേഷണ ഏജൻസിയായ മിനിസ്ട്രി ഓഫ് സ്റ്റേറ്റ് സെക്യൂരിറ്റിയുടെ (MSS) നിർദ്ദേശപ്രകാരം ജെൻസൻ ഹുവാങ്ങുമായി ആലീസ് ഹുവാങ് അടുത്ത ബന്ധം സ്ഥാപിക്കുകയായിരുന്നുവെന്നാണ് യു.എസ് ഇന്റലിജൻസ് നിഗമനം. യു.എസ് സുരക്ഷാ ഏജൻസികൾ നടത്തിയ ഇലക്ട്രോണിക് നിരീക്ഷണത്തിൽ നിന്നാണ് ഈ ബന്ധത്തിന്റെ നിർണ്ണായക വിവരങ്ങൾ ലഭിച്ചത്. ഇവർ തമ്മിലുള്ള രഹസ്യബന്ധം വ്യക്തമാക്കുന്ന റിപ്പോർട്ട് യു.എസ് പ്രസിഡന്റ് ഡൊണാൾഡ് ട്രംപിന്റെ ചൈന സന്ദർശനത്തിന് മുന്നോടിയായാണ് കൈമാറിയിരുന്നത്. ഇതിന്റെ അടിസ്ഥാനത്തിൽ ട്രംപിന്റെ മേയ് മാസത്തിലെ ചൈനീസ് ഔദ്യോഗിക പ്രതിനിധി സംഘത്തിൽ നിന്ന് ആദ്യം ജെൻസൻ ഹുവാങ്ങിനെ ഒഴിവാക്കിയിരുന്നതായും മാധ്യമങ്ങൾ വെളിപ്പെടുത്തുന്നു.
എന്നാൽ, എ.ഐ ചിപ്പ് മേഖലയിൽ എൻവിഡിയയ്ക്കുള്ള ആഗോള മേധാവിത്വവും അമേരിക്കൻ ഓഹരി വിപണിയിലുള്ള നിർണ്ണായക പങ്കും മുൻനിർത്തി വിഷയത്തിൽ അടിയന്തര വിചാരണക്കോ നടപടികൾക്കോ ഡൊണാൾഡ് ട്രംപ് അന്ന് മുതിർന്നിരുന്നില്ല. ജെൻസൻ ഹുവാങ് ആദരണീയനായ വ്യക്തിയാണെന്നും ഇതേക്കുറിച്ച് അദ്ദേഹത്തിന് നൽകാൻ കൃത്യമായ വിശദീകരണമുണ്ടാകുമെന്നാണ് കരുതുന്നതെന്നുമാണ് വിവാദങ്ങൾ പുറത്തുവന്നതിന് ശേഷം ട്രംപ് മാധ്യമങ്ങളോട് പ്രതികരിച്ചത്.
വിവാദം കൊടുമ്പിരിക്കൊണ്ടതോടെ, ഭാര്യയോടും കുടുംബത്തോടും വിശ്വസ്തത കാട്ടിയില്ലെന്നും തന്റെ പ്രവർത്തികളിൽ ക്ഷമ ചോദിക്കുന്നുവെന്നും കാണിച്ച് ജെൻസൻ ഹുവാങ് എൻവിഡിയ ജീവനക്കാർക്ക് കത്തയച്ചിരുന്നു. എങ്കിലും, എൻവിഡിയ കമ്പനിയുടെ സാങ്കേതിക രഹസ്യങ്ങളോ അമേരിക്കയുടെ ദേശീയ സുരക്ഷയോ ചോർന്നിട്ടില്ലെന്നാണ് കമ്പനി വക്താവ് അവകാശപ്പെടുന്നത്. സംഭവത്തിൽ എൻവിഡിയ ഡയറക്ടർ ബോർഡിന്റെ സ്വതന്ത്ര അന്വേഷണം പുരോഗമിക്കുകയാണ്.
