പ്രധാനമന്ത്രി നരേന്ദ്ര മോദിയുടെ ഭരണനേട്ടങ്ങളെയും കഴിഞ്ഞ രണ്ടു പതിറ്റാണ്ടിനിടെ ഇന്ത്യ കൈവരിച്ച വിസ്മയിപ്പിക്കുന്ന മാറ്റങ്ങളെയും പ്രശംസിച്ച് മുൻ ഇംഗ്ലണ്ട് ക്രിക്കറ്റ് ക്യാപ്റ്റൻ കെവിൻ പീറ്റേഴ്‌സൺ എഴുതിയ ലേഖനം സോഷ്യൽ മീഡിയയിൽ വലിയ തോതിൽ ശ്രദ്ധ നേടുന്നു. ‘അഭിലാഷങ്ങളും നേട്ടങ്ങളും നിറഞ്ഞ, ആത്മവിശ്വാസമുള്ള പുതിയ ഇന്ത്യ’ എന്ന പേരിൽ പുറത്തുവന്ന അദ്ദേഹത്തിന്റെ കുറിപ്പാണ് ഇപ്പോൾ ഇന്റർനെറ്റിൽ സജീവ ചർച്ചയായിരിക്കുന്നത്.
ഭരണത്തലവൻ എന്ന നിലയിൽ 25 വർഷം പിന്നിട്ട പ്രധാനമന്ത്രി നരേന്ദ്ര മോദിയുടെ രാഷ്ട്രീയ യാത്രയെ ക്രിക്കറ്റിലെ നീണ്ട കരിയറിനോടാണ് പീറ്റേഴ്‌സൺ ഉപമിക്കുന്നത്. 2014-ൽ മോദി പ്രധാനമന്ത്രിയായതിനു ശേഷം ബ്രിട്ടനിൽ ആറ് പ്രധാനമന്ത്രിമാർ മാറിവന്നപ്പോഴും ഇന്ത്യയിൽ ഇത്തരമൊരു സ്ഥിരത നിലനിൽക്കുന്നത് അസാധാരണമാണെന്ന് അദ്ദേഹം ചൂണ്ടിക്കാട്ടുന്നു. 2003-ൽ താൻ ആദ്യം വരുമ്പോൾ കണ്ട സങ്കോചമല്ല ഇന്നത്തെ ഇന്ത്യക്കുള്ളതെന്നും സ്വന്തം കഴിവിൽ തികഞ്ഞ ആത്മവിശ്വാസമുള്ള, വലിയ സ്വപ്നങ്ങൾ കാണുന്ന ഒരു തലമുറയാണ് ഇന്നുള്ളതെന്നും അദ്ദേഹം വ്യക്തമാക്കുന്നു.
ഇന്ത്യൻ ക്രിക്കറ്റിലെ അസാധാരണമായ ബെഞ്ച് കരുത്ത്, ലോകശ്രദ്ധ നേടിയ വനിതാ ക്രിക്കറ്റിന്റെ വളർച്ച, അത്‌ലറ്റിക്സ് ഉൾപ്പെടെയുള്ള മറ്റ് കായിക ഇനങ്ങളിൽ രാജ്യം കൈവരിക്കുന്ന ആഗോള നേട്ടങ്ങൾ എന്നിവ പുതിയ ഇന്ത്യയുടെ കായിക സംസ്കാരത്തിന് തെളിവാണെന്ന് പീറ്റേഴ്‌സൺ നിരീക്ഷിക്കുന്നു. പ്രധാനമന്ത്രിയുടെ ‘ഫിറ്റ് ഇന്ത്യ’ ആഹ്വാനവും യോഗയെ ആഗോളതലത്തിലേക്ക് എത്തിച്ചതും ഇതിന് കരുത്തുപകർന്നു. കൂടാതെ മുൻപ് ഇന്ത്യയിലെ ചൂടിനെയും തിരക്കിനെയും കുറിച്ച് ചോദിച്ചിരുന്ന വിദേശ സുഹൃത്തുക്കൾ ഇന്ന് ഇന്ത്യ കയറ്റുമതി ചെയ്ത വാക്സിനുകളെക്കുറിച്ചും, സ്റ്റാർട്ടപ്പുകളെക്കുറിച്ചും, മൂൺ ലാൻഡിംഗിനെക്കുറിച്ചും, ഡിജിറ്റൽ പേയ്‌മെന്റുകളെക്കുറിച്ചുമാണ് അത്ഭുതത്തോടെ സംസാരിക്കുന്നതെന്നും അദ്ദേഹം കുറിക്കുന്നു.
കാസിരംഗയിലെ കാണ്ടാമൃഗ സംരക്ഷണം, ചീറ്റപ്പുലികളുടെ തിരിച്ചുവരവ്, ഏഷ്യാറ്റിക് സിംഹങ്ങളുടെ സംരക്ഷണം, ‘ഇന്റർനാഷണൽ ബിഗ് ക്യാറ്റ് അലയൻസ്’ എന്നിവ ചൂണ്ടിക്കാട്ടി ദ്രുതഗതിയിലുള്ള വ്യാവസായിക വളർച്ചയ്ക്കൊപ്പം വന്യജീവികളെയും പ്രകൃതിയെയും ചേർത്തുപിടിക്കുന്ന ഇന്ത്യയുടെ ശൈലിയെ അദ്ദേഹം വാനോളം പുകഴ്ത്തുന്നു.
പാരമ്പര്യവും അത്യാധുനിക സാങ്കേതികവിദ്യയും ഒത്തുപോകുന്ന, വ്യക്തമായ ലക്ഷ്യബോധമുള്ള ഒരു രാജ്യമായി ഇന്ത്യ മാറിയെന്ന പീറ്റേഴ്‌സന്റെ തുറന്നുപറച്ചിൽ ക്രിക്കറ്റ് പ്രേമികളും രാഷ്ട്രീയ നിരീക്ഷകരും വലിയ തോതിലാണ് സോഷ്യൽ മീഡിയയിൽ ഏറ്റെടുത്തിരിക്കുന്നത്. വിവിധ ഓൺലൈൻ പ്ലാറ്റ്‌ഫോമുകളിൽ കുറിപ്പ് ഇതിനകം തന്നെ ചൂടേറിയ ചർച്ചകൾക്ക് വഴിവെച്ചിട്ടുണ്ട്.
