വൈദ്യുതി വാങ്ങലുമായി ബന്ധപ്പെട്ട് ജി.എൻ.എ (GNA) കമ്പനിയുമായി സംസ്ഥാന സർക്കാർ യാതൊരു കരാറിലും ഏർപ്പെട്ടിട്ടില്ലെന്ന് മുഖ്യമന്ത്രി വി. ഡി. സതീശൻ വ്യക്തമാക്കി. പിന്നെ എങ്ങനെയാണ് കരാറിൽ നിന്ന് പിന്മാറി എന്ന ചോദ്യം ഉയരുന്നതെന്ന് അദ്ദേഹം വാർത്താസമ്മേളനത്തിൽ ചോദിച്ചു. വൈദ്യുതി ആവശ്യകത മുന്നിൽ കണ്ട് ഹിമാചൽ പ്രദേശ്, ജി.എൻ.എ എന്നീ രണ്ട് നിർദ്ദേശങ്ങളാണ് സർക്കാരിന്റെ മുന്നിൽ വന്നത്. ഇതിൽ ഏതാണ് കൂടുതൽ ലാഭകരം എന്ന് താരതമ്യം ചെയ്യാനുള്ള നിർദ്ദേശം മാത്രമാണ് മുന്നോട്ട് വെച്ചതെന്നും ജി.എൻ.എയുമായി ഒരു ധാരണാപത്രത്തിലും ഒപ്പിട്ടിട്ടില്ലെന്നും അദ്ദേഹം കൂട്ടിച്ചേർത്തു.
സംസ്ഥാനത്ത് അടിയന്തരമായി പവർക്കട്ട് വേണ്ടിവരുമെന്ന് കാണിച്ച് റിപ്പോർട്ട് നൽകിയത് ഉദ്യോഗസ്ഥരുടെ ഭാഗത്തുനിന്ന് കരാറിൽ ഒപ്പുവെപ്പിക്കാനുള്ള സമ്മർദ്ദ തന്ത്രമാണോ എന്ന് സംശയമുണ്ടെന്ന് മുഖ്യമന്ത്രി അഭിപ്രായപ്പെട്ടു. അടിയന്തര പ്രാധാന്യത്തോടെ ഒപ്പുവെക്കണം എന്ന് പറഞ്ഞ് തനിക്ക് മുന്നിലേക്ക് ഫയൽ അയച്ചാൽ കണ്ണുമൂടി ഒപ്പിടാൻ നിൽക്കുന്ന ആളല്ല താനെന്നും അദ്ദേഹം വ്യക്തമാക്കി. കഴിഞ്ഞ പത്ത് വർഷമായി മുൻ സർക്കാർ ദീർഘകാല വൈദ്യുതി കരാറുകളിൽ ഏർപ്പെടാതിരുന്നതാണ് നിലവിലുണ്ടാകുന്ന പവർക്കട്ട് ഭീഷണിക്ക് പ്രധാന കാരണം. വിപണിയിലെ ലഭ്യത കുറവും ഉയർന്ന നിരക്കുമാണ് നിലവിലെ പ്രതിസന്ധിക്ക് പശ്ചാത്തലമെന്നും മുഖ്യമന്ത്രി ചൂണ്ടിക്കാട്ടി.
വൈദ്യുതി മന്ത്രി ഈ വിഷയത്തിൽ പ്രതികരിച്ചത് പൂർണ്ണമായും ശരിയായ നിലപാടാണെന്നും ജി.എൻ.എയുമായി കരാർ ഒപ്പിട്ടാൽ മാത്രമേ മന്ത്രിയുടെ പക്കലേക്ക് കൂടുതൽ വിവരങ്ങൾ എത്തുകയുള്ളൂ എന്നും വി. ഡി. സതീശൻ പറഞ്ഞു. മാധ്യമങ്ങളിൽ വരുന്ന പല വാർത്തകളും വസ്തുതകൾ മനസ്സിലാക്കാതെയുള്ളതാണ്. പ്രതിപക്ഷം ആരോപിക്കുന്നത് പോലെ യാതൊരുവിധ അഴിമതിയും ഈ നീക്കത്തിൽ നടന്നിട്ടില്ല. വരും ദിവസങ്ങളിൽ സംസ്ഥാനത്തെ വൈദ്യുതി പ്രതിസന്ധിക്ക് ശാശ്വത പരിഹാരം കാണുമെന്നും ദീർഘകാല കരാറുകൾ ഉണ്ടാക്കാനാണ് സർക്കാർ ലക്ഷ്യമിടുന്നതെന്നും മുഖ്യമന്ത്രി അറിയിച്ചു.
