കൊച്ചിയിലെ ബാർ ഹോട്ടലുകളിൽ ഡിജെ പാർട്ടികൾ നടത്തുന്നത് തടയാൻ പോലീസിന് അധികാരമില്ലെന്ന് വ്യക്തമാക്കി ഹൈക്കോടതി ഉത്തരവിറക്കി. കുറ്റകൃത്യങ്ങളും ലഹരി ഉപയോഗവും നടക്കാൻ സാധ്യതയുണ്ടെന്ന് ചൂണ്ടിക്കാട്ടി ഹോട്ടലുകൾക്ക് പോലീസ് നൽകിയ വിലക്ക് നോട്ടീസുകൾ കോടതി റദ്ദാക്കി. കൊച്ചിയിലെ റാഡിസൺ ബ്ലൂ ഹോട്ടൽ അധികൃതർ നൽകിയ ഹർജിയിലാണ് ജസ്റ്റിസ് മുരളി പുരുഷോത്തമന്റെ ബെഞ്ച് ഈ നിർണ്ണായക വിധി പ്രസ്താവിച്ചത്. എഫ്.എൽ-3 ലൈസൻസുള്ള സ്ഥാപനങ്ങൾക്ക് അനുവദിക്കപ്പെട്ടിട്ടുള്ള പ്രവർത്തന സമയം ഏകപക്ഷീയമായി വെട്ടിക്കുറയ്ക്കാൻ പോലീസിന് സാധിക്കില്ലെന്ന് കോടതി വ്യക്തമാക്കി.
ഡിജെ പാർട്ടികളുടെ മറവിൽ വ്യാപകമായി ലഹരി ഇടപാടുകൾ നടക്കുന്നുണ്ടെന്നും ഇത് വലിയ ക്രമസമാധാന പ്രശ്നങ്ങൾ സൃഷ്ടിക്കുന്നുണ്ടെന്നുമാണ് പോലീസ് കോടതിയിൽ വാദിച്ചത്. രാത്രി 12 മണിക്ക് ശേഷം പാർട്ടികൾ നടത്തരുതെന്നായിരുന്നു പോലീസ് നിർദ്ദേശം. എന്നാൽ കൃത്യമായി ഫീസ് അടച്ച് പ്രവർത്തിക്കുന്ന എഫ്.എൽ-3 ലൈസൻസുള്ള ഹോട്ടലുകൾക്ക് പുലർച്ചെ മൂന്ന് മണി വരെ പ്രവർത്തിക്കാൻ നിയമപരമായി അവകാശമുണ്ടെന്ന് ഹൈക്കോടതി ചൂണ്ടിക്കാട്ടി. ലഹരി ഉപയോഗവും നിയമവിരുദ്ധ പ്രവർത്തനങ്ങളും ഉണ്ടായാൽ കുറ്റക്കാർക്കെതിരെ കൃത്യമായ നിയമനടപടി സ്വീകരിക്കുകയാണ് പോലീസ് ചെയ്യേണ്ടതെന്നും അല്ലാതെ സ്ഥാപനങ്ങളുടെ പ്രവർത്തനം മൊത്തത്തിൽ തടയുകയല്ല വേണ്ടതെന്നും കോടതി വിമർശിച്ചു.
ബാറുകളുടെയോ ഡിജെ പാർട്ടികളുടെയോ പ്രവർത്തന സമയത്തിൽ മാറ്റം വരുത്തണമെന്ന് ആഗ്രഹിക്കുന്നുണ്ടെങ്കിൽ സർക്കാർ പുതിയ നിയമമോ ചട്ടമോ കൊണ്ടുവരണമെന്ന് ഹൈക്കോടതി വ്യക്തമാക്കി. അത്തരത്തിൽ വ്യക്തമായ ചട്ടങ്ങൾ നിലവിൽ വന്നാൽ മാത്രമേ പോലീസിന് സമയക്രമത്തിൽ ഇടപെടാൻ അധികാരമുള്ളൂ. എന്നാൽ രാത്രികാലങ്ങളിൽ അനുവദനീയമായ പരിധിയിൽ കൂടുതൽ ശബ്ദമലിനീകരണം ഉണ്ടായാൽ പോലീസിന് അത് തടയാൻ നിയമപരമായ നടപടികൾ സ്വീകരിക്കാമെന്നും ഉത്തരവിൽ പറയുന്നുണ്ട്. ഹൈക്കോടതി വിധി വന്നതോടെ കൊച്ചിയിലെ ഹോട്ടലുകളിൽ ഡിജെ പാർട്ടികൾക്ക് ഏർപ്പെടുത്തിയിരുന്ന നിയന്ത്രണങ്ങൾക്ക് താൽക്കാലികമായി അയവ് വന്നിരിക്കുകയാണ്.
