കടുത്ത സാമ്പത്തിക പ്രതിസന്ധിയും പട്ടിണിയും മൂലം ജീവിക്കാൻ മറ്റ് മാർഗ്ഗങ്ങളില്ലാതെ സ്വന്തം ശരീരാവയവങ്ങൾ വിൽക്കാൻ തയ്യാറായി ഇറാൻ പൗരന്മാർ. തലസ്ഥാന നഗരമായ ടെഹ്റാനിലെ തെരുവുകളിൽ രക്തവും കരളും വൃഷണങ്ങളും ഉൾപ്പെടെയുള്ള ശരീരാവയവങ്ങൾ വിൽക്കാൻ തയ്യാറാണെന്ന് അറിയിച്ചുകൊണ്ടുള്ള പരസ്യങ്ങൾ വ്യാപകമായി പ്രത്യക്ഷപ്പെടുന്നതായാണ് റിപ്പോർട്ടുകൾ.
കടബാധ്യതകൾ തീർക്കാനും കിടപ്പാടം നഷ്ടപ്പെടാതിരിക്കാനും വേണ്ടിയാണ് സാധാരണക്കാരായ പൗരന്മാർ സ്വന്തം ശരീരം വിൽക്കാൻ നിർബന്ധിതരാകുന്നത്. വൃക്കകൾ, കരളിന്റെ കോശഭാഗങ്ങൾ (ലിവർ ടിഷ്യൂ), അസ്ഥിമജ്ജ (ബോൺ മാരോ) എന്നിവയ്ക്കാണ് വിപണിയിൽ കൂടുതൽ ആവശ്യക്കാരുള്ളത്. ഇതിനുപുറമേ എ+, എ-, ഒ+, ഒ- തുടങ്ങിയ വിവിധ രക്തഗ്രൂപ്പുകൾ വിൽക്കാനും നിരവധി പേർ മുന്നോട്ടുവരുന്നുണ്ടെന്ന് ഇറാൻ ഇന്റർനാഷണൽ റിപ്പോർട്ട് ചെയ്യുന്നു.
ഏറ്റവും ഒടുവിലായി, കടുത്ത സാമ്പത്തിക ബുദ്ധിമുട്ടിനെത്തുടർന്ന് തന്റെ വൃഷണങ്ങൾ പോലും വിൽക്കാൻ സന്നദ്ധത അറിയിച്ച് ഒരു സാധാരണ തൊഴിലാളി തെരുവിൽ പരസ്യം പതിച്ചത് രാജ്യാന്തര തലത്തിൽ വലിയ ചർച്ചയായിരിക്കുകയാണ്. സംഭവത്തിൽ അന്താരാഷ്ട്ര മനുഷ്യാവകാശ പ്രവർത്തകർ കടുത്ത ആശങ്കയാണ് രേഖപ്പെടുത്തുന്നത്.
ഇറാനിൽ നിലവിൽ വൃക്ക വിൽപ്പന നിയമപരമാണെങ്കിലും മറ്റ് അവയവങ്ങളുടെ കച്ചവടത്തിന് അനുമതിയില്ല.എന്നാൽ, സാമ്പത്തിക തകർച്ചയും പണപ്പെരുപ്പവും തൊഴിലില്ലായ്മയും രൂക്ഷമായതോടെ കരിഞ്ചന്ത വഴിയുള്ള അവയവ വിൽപ്പന രാജ്യത്ത് തഴച്ചുവളരുകയാണ്. പോഷകാഹാരക്കുറവ് മൂലം അവശരായ ദരിദ്രരാണ് ഇത്തരത്തിൽ അവയവങ്ങൾ വിൽക്കാൻ നിർബന്ധിതരാകുന്നതെന്നും, ഇത് ഇറാന്റെ സാമ്പത്തിക തകർച്ചയുടെ ഭീകരമായ നേർചിത്രമാണെന്നും സാമ്പത്തിക വിദഗ്ധർ ചൂണ്ടിക്കാട്ടുന്നു.
