ദക്ഷിണ കശ്മീരിലെ കുൽഗാം ജില്ലയിൽ സുരക്ഷാസേനയും ഭീകരരും തമ്മിലുണ്ടായ രൂക്ഷമായ ഏറ്റുമുട്ടലിൽ ഒരു കൊടുംഭീകരനെ സൈന്യം വധിച്ചു. എന്നാൽ, ഏറ്റുമുട്ടലിൽ വെടിയേറ്റ് ഗുരുതരമായി പരിക്കേറ്റ മറ്റൊരു മുഖ്യഭീകരൻ വനമേഖലയിലേക്ക് രക്ഷപ്പെട്ടു. തിങ്കളാഴ്ച ശ്രീനഗറിൽ നിന്ന് ഏകദേശം 100 കിലോമീറ്റർ അകലെയുള്ള ലാർനൂ (Larnoo) മേഖലയിലായിരുന്നു സംഭവം. ‘ബി’ കാറ്റഗറിയിൽപ്പെട്ട ഭീകരനായ ഉമർ നാസിറാണ് സൈന്യത്തിന്റെ വെടിയേറ്റ് കൊല്ലപ്പെട്ടത്. ഇയാളുടെ മൃതദേഹം പോലീസ് കണ്ടെടുത്തു.
അതേസമയം, ഉമർ നാസിറിനൊപ്പമുണ്ടായിരുന്ന മുഹമ്മദ് ലത്തീഫ് ഭട്ട് എന്ന ‘എ’ കാറ്റഗറി ഭീകരനാണ് പരിക്കുകളോടെ രക്ഷപ്പെട്ടത്. ഇയാളെ പിടികൂടുന്നവർക്ക് സർക്കാർ 15 ലക്ഷം രൂപ പാരിതോഷികം പ്രഖ്യാപിച്ചിരുന്നു. ഏറ്റുമുട്ടലിനിടെ വെടിയേറ്റ ലത്തീഫ് ഭട്ട് സമീപത്തെ ഇടതൂർന്ന വനമേഖലയിലേക്കും ആപ്പിൾ തോട്ടങ്ങളിലേക്കും ഓടിമറയുകയായിരുന്നു. രക്ഷപ്പെട്ട ഭീകരനെ കണ്ടെത്തുന്നതിനായി സുരക്ഷാസേന മേഖലയിൽ തിരച്ചിൽ ഊർജിതമാക്കിയിട്ടുണ്ട്. വനമേഖലയിലെ ഓരോ ചലനവും നിരീക്ഷിക്കുന്നതിനായി അത്യാധുനിക ഡ്രോണുകളും സ്നിഫർ നായ്ക്കളെയും വിന്യസിച്ചിട്ടുണ്ട്.
ജമ്മു കശ്മീർ പോലീസ് ഡയറക്ടർ ജനറൽ നളിൻ പ്രഭാത്, കശ്മീർ സോൺ ഇൻസ്പെക്ടർ ജനറൽ സുജിത് കുമാർ തുടങ്ങിയ ഉന്നത ഉദ്യോഗസ്ഥർ നേരിട്ട് സ്ഥലത്തെത്തി തിരച്ചിൽ പ്രവർത്തനങ്ങൾക്ക് നേതൃത്വം നൽകുന്നുണ്ട്. കഴിഞ്ഞ നവംബർ 11-ന് കുൽഗാമിലെ മിർ ബസാറിലുള്ള സി.ആർ.പി.എഫ് പോസ്റ്റിന് നേരെ നടന്ന ഭീകരാക്രമണത്തിന് പിന്നിൽ പ്രവർത്തിച്ചത് ഇവരായിരുന്നു. അന്നത്തെ ആക്രമണത്തിൽ മൂന്ന് സി.ആർ.പി.എഫ് ജവാന്മാർക്ക് പരിക്കേറ്റിരുന്നു. ഈ ഭീകരർക്ക് സഹായം നൽകിയ പ്രാദേശിക സഹായിയെയും (Overground worker) സുരക്ഷാസേന കസ്റ്റഡിയിലെടുത്തിട്ടുണ്ട്.
കശ്മീർ താഴ്വരയിൽ പ്രാദേശിക ഭീകരവാദ റിക്രൂട്ട്മെന്റ് ഏതാണ്ട് പൂർണ്ണമായും നിലച്ച സാഹചര്യത്തിലാണ് ഈ ഏറ്റുമുട്ടൽ നടക്കുന്നത്. നിലവിൽ താഴ്വരയിൽ അവശേഷിക്കുന്ന ഏറ്റവും പ്രധാനപ്പെട്ട പ്രാദേശിക ഭീകരനാണ് രക്ഷപ്പെട്ട ലത്തീഫ് ഭട്ട് എന്നാണ് രഹസ്യാന്വേഷണ ഏജൻസികളുടെ വിലയിരുത്തൽ. കശ്മീരിൽ ആകെ നാലോ അഞ്ചോ പ്രാദേശിക ഭീകരർ മാത്രമാണ് ഇപ്പോൾ സജീവമായുള്ളതെന്നും, ഈ വർഷം ഇതുവരെ 16 ഭീകരരെ സുരക്ഷാസേന വധിച്ചതായും ഉദ്യോഗസ്ഥർ വ്യക്തമാക്കി. വെല്ലുവിളികൾ നിലനിൽക്കുമ്പോഴും താഴ്വരയിൽ സമാധാനം നിലനിർത്താൻ ശക്തമായ നടപടികൾ തുടരുമെന്ന് സി.ആർ.പി.എഫ് സ്പെഷ്യൽ ഡയറക്ടർ ജനറൽ സന്ദീപ് ഖിർവാറും അറിയിച്ചു.











