ഉത്തരാഖണ്ഡിലെ ഹരിദ്വാറിൽ 11 മാസം പ്രായമുള്ള പെൺകുഞ്ഞിനെ കുടുംബസുഹൃത്ത് ക്രൂരമായി പീഡിപ്പിച്ചു. ഗുരുതരമായി പരിക്കേറ്റ പിഞ്ചുകുഞ്ഞിനെ ഋഷികേശിലെ എയിംസ് (AIIMS) ആശുപത്രിയിൽ പ്രവേശിപ്പിച്ചിരിക്കുകയാണ്. കുഞ്ഞിന്റെ ആരോഗ്യനില അതീവ ഗുരുതരമായി തുടരുകയാണെന്നാണ് ആശുപത്രി അധികൃതർ നൽകുന്ന വിവരം. സംഭവത്തിന് പിന്നാലെ ഒളിവിൽ പോയ പ്രതിക്കായി ഹരിദ്വാർ പോലീസ് വ്യാപകമായ തിരച്ചിൽ ആരംഭിച്ചിട്ടുണ്ട്.
ഉത്തർപ്രദേശിലെ ദിയോറിയ സ്വദേശികളായ ഫാക്ടറി തൊഴിലാളി ദമ്പതികളുടെ കുഞ്ഞിനാണ് ക്രൂരമായ പീഡനം നേരിടേണ്ടി വന്നത്. ദമ്പതികളുടെ സഹപ്രവർത്തകനും കുടുംബസുഹൃത്തുമായ ബിഹാർ ഭാഗൽപൂർ സ്വദേശിക്കെതിരെയാണ് പോലീസ് കേസെടുത്തിരിക്കുന്നത്. അടുത്തിടെയാണ് ഇയാൾ ഇതേ ഫാക്ടറിയിൽ ജോലിക്കെത്തിയതെന്നും, ഇവരുടെ താമസസ്ഥലത്തിന് സമീപം തന്നെയാണ് താമസിച്ചിരുന്നതെന്നും പോലീസ് വ്യക്തമാക്കി.
കുട്ടിയുടെ അമ്മ അടുക്കളയിൽ ഭക്ഷണം തയ്യാറാക്കിക്കൊണ്ടിരുന്ന സമയത്താണ് പ്രതി ഇവരുടെ താമസസ്ഥലത്ത് എത്തിയത്. ഈ സമയം കുഞ്ഞ് കരയുന്നത് കണ്ട്, താൻ കരച്ചിൽ മാറ്റാമെന്നും സമാധാനിപ്പിക്കാമെന്നും പറഞ്ഞാണ് ഇയാൾ കുഞ്ഞിനെ അമ്മയുടെ അടുത്തുനിന്നും വാങ്ങിയത്. തുടർന്ന് വീടിന്റെ വരാന്തയിലൂടെ കുഞ്ഞുമായി നടന്ന ഇയാൾ, അമ്മയുടെ കണ്ണുവെട്ടിച്ച് കുഞ്ഞിനെ തന്റെ മുറിയിലേക്ക് കൊണ്ടുപോവുകയായിരുന്നു.
അല്പസമയത്തിന് ശേഷം മുറിയിൽ നിന്നും കുഞ്ഞിന്റെ അസ്വാഭാവികമായ നിലവിളി കേട്ട് പരിഭ്രാന്തയായി ഓടിയെത്തിയ അമ്മ കണ്ടത് രക്തം വാർന്ന് സാരമായി പരിക്കേറ്റ നിലയിൽ കിടക്കുന്ന കുഞ്ഞിനെയാണ്. അമ്മയെ കണ്ടതോടെ പ്രതി സംഭവസ്ഥലത്തുനിന്നും ഇറങ്ങിയോടി രക്ഷപ്പെടുകയായിരുന്നു. ഉടൻ തന്നെ മാതാപിതാക്കൾ കുഞ്ഞിനെ അടുത്തുള്ള ആശുപത്രിയിലും തുടർന്ന് വിദഗ്ധ ചികിത്സയ്ക്കായി ഋഷികേശ് എയിംസിലും എത്തിച്ചു.
മാതാപിതാക്കളുടെ പരാതിയിൽ പോക്സോ (POCSO) നിയമത്തിലെ വിവിധ വകുപ്പുകൾ ഉൾപ്പെടെ ചുമത്തിയാണ് ഹരിദ്വാർ പോലീസ് കേസ് രജിസ്റ്റർ ചെയ്തിരിക്കുന്നത്. നാടിനെ നടുക്കിയ ഈ ക്രൂരകൃത്യത്തിന് ശേഷം ഒളിവിൽ പോയ പ്രതിയെ പിടികൂടുന്നതിനായി പ്രത്യേക അന്വേഷണ സംഘത്തെ രൂപീകരിച്ചിട്ടുണ്ടെന്നും, ഇയാളുടെ സ്വദേശമായ ബിഹാറിലേക്കും അന്വേഷണം വ്യാപിപ്പിച്ചിട്ടുണ്ടെന്നും പോലീസ് അറിയിച്ചു.












