കൊച്ചി: വാഹനങ്ങളിൽ വരുന്ന ട്രാഫിക് പിഴയടയ്ക്കാൻ വാട്സാപ്പിൽ എത്തുന്ന ഔദ്യോഗികലിങ്കുകൾ കണ്ട് പെട്ടുപോകരുതെന്ന് മോട്ടോർ വാഹന വകുപ്പിന്റെയും സൈബർ പൊലീസിന്റെയുംമുന്നറിയിപ്പ്. പിഴയടയ്ക്കാനെന്ന പേരിൽ തട്ടിപ്പുകാർ അയയ്ക്കുന്ന വ്യാജ ലിങ്കുകളിൽ കയറി പണംനഷ്ടപ്പെടുന്നവരുടെ എണ്ണം ദിനംപ്രതി പെരുകുകയാണ്. എറണാകുളം കാക്കനാട് ഉൾപ്പെടെയുള്ളആർ.ടി.ഒ ഓഫീസുകളിൽ സമാനമായ പരാതിയുമായി നിരവധി വാഹന ഉടമകളാണ് ദിവസവുംഎത്തുന്നത്.
”സാറേ, പിഴയടച്ചതാണ്. 500 രൂപയുടെ പിഴയ്ക്ക് 1,000 രൂപയിലേറെ ഈടാക്കി. പണമടച്ചിട്ടുംമോട്ടോർ വാഹന വകുപ്പിന്റെ സൈറ്റിൽ നോക്കുമ്പോൾ പിഴ ബാക്കിയെന്നാണ് കാണിക്കുന്നത്. പണം പോയോ? ഇനി വീണ്ടും അടയ്ക്കണോ?” എന്നാണ് ആർ.ടി.ഒ ഓഫീസുകളിലെത്തുന്ന വാഹനഉടമകൾ ഉദ്യോഗസ്ഥരോട് ആശങ്കയോടെ ചോദിക്കുന്നത്. പരാതിക്കാരെ സൈബർ പൊലീസിലേക്ക്പറഞ്ഞയയ്ക്കുകയല്ലാതെ മറ്റൊരു വഴിയില്ലാത്ത അവസ്ഥയിലാണ് മോട്ടോർ വാഹന വകുപ്പ്ഉദ്യോഗസ്ഥരും.
നിയമലംഘനവും വാഹനത്തിന്റെ റജിസ്ട്രേഷൻ നമ്പറും പിഴത്തുകയും കൃത്യമായി ഉൾപ്പെടുത്തിവാട്സാപ്പിൽ ലഭിക്കുന്ന സന്ദേശങ്ങളാണ് സാധാരണക്കാരെ കുരുക്കുന്നത്. ഗതാഗത വകുപ്പിന്റെഔദ്യോഗിക സംവിധാനത്തിൽനിന്നുള്ള അറിയിപ്പാണെന്ന് തെറ്റിദ്ധരിച്ച് ആളുകൾ ഈ ലിങ്കിൽ ക്ലിക്ക്ചെയ്ത് പണമടയ്ക്കുകയാണ് പതിവ്. പണമടയ്ക്കുന്നതോടെ ഈ തുക തട്ടിപ്പുകാരുടെഅക്കൗണ്ടിലേക്ക് നേരിട്ട് പോകും. ചില സന്ദർഭങ്ങളിൽ ഈ വ്യാജ ലിങ്കുകളിൽ കയറുന്നവരുടെഫോണുകളും ബാങ്ക് അക്കൗണ്ടുകളും പൂർണ്ണമായി ഹാക്ക് ചെയ്യപ്പെടുകയും അക്കൗണ്ടിലുള്ളമുഴുവൻ പണവും നഷ്ടപ്പെടുന്ന ഗുരുതരമായ സാഹചര്യവുമുണ്ട്. കഴിഞ്ഞ ദിവസങ്ങളിൽഎറണാകുളം ജില്ലയിൽമാത്രം പത്തോളം പേരുടെ ബാങ്ക് അക്കൗണ്ടുകൾ ഇപ്രകാരംചോർത്തപ്പെട്ടതായാണ് സൈബർ പൊലീസിന് ലഭിച്ചിരിക്കുന്ന വിവരം.
കേന്ദ്ര സർക്കാരിന്റെ ഔദ്യോഗിക ‘പരിവാഹൻ’ (Parivahan) വെബ്സൈറ്റ് വഴി മാത്രമെവാഹനങ്ങളുടെ ട്രാഫിക് പിഴ വിവരങ്ങൾ പരിശോധിക്കാനും ഓൺലൈനായി അടയ്ക്കാനുംപാടുള്ളൂവെന്ന് അധികൃതർ വ്യക്തമാക്കി. വാട്സാപ്പിലോ എസ്.എം.എസായോ ലഭിക്കുന്നലിങ്കുകളിൽ ക്ലിക്ക് ചെയ്ത് ഒരിക്കലും പണം അടയ്ക്കരുത്. തട്ടിപ്പിനിരയായാൽ ഉടൻ തന്നെനാഷണൽ സൈബർ ക്രൈം ഹെൽപ്ലൈൻ നമ്പറായ 1930-ൽ ബന്ധപ്പെടണമെന്നും പൊലീസ്മുന്നറിയിപ്പ് നൽകുന്നു.












