ന്യൂഡൽഹി : ഇന്ത്യക്കെതിരെ നിരന്തരം ഭീകരപ്രവർത്തനങ്ങളും വിഘടനവാദവും പ്രചരിപ്പിക്കുന്ന ഖലിസ്ഥാൻ ഭീകരൻ ഗുർപത്വന്ത് സിങ് പന്നൂന്റെ കെട്ടിച്ചമച്ച പരാതിയിൽ, രാജ്യത്തിന്റെ സുരക്ഷാ കവചമായ ദേശീയ സുരക്ഷാ ഉപദേഷ്ടാവ് അജിത് ദോവലിനും മുൻ റോ (R&AW) മേധാവി സമന്ത് ഗോയലിനുമെതിരെ അമേരിക്കൻ കോടതി നടത്തുന്ന നീക്കങ്ങൾക്കെതിരെ ശക്തമായ പ്രതിഷേധം. പന്നൂൻ നൽകിയ സിവിൽ കേസിൽ ദോവലിനും ഗോയലിനും സമൻസ് കൈമാറാൻ ഡൽഹിയിലെ കീഴ്ക്കോടതികളുടെ സഹായം തേടിയ ന്യൂയോർക്ക് സതേൺ ഡിസ്ട്രിക്റ്റ് കോടതിയുടെ നടപടി ഇന്ത്യയുടെ പരമാധികാരത്തെയും അന്താരാഷ്ട്ര നയതന്ത്ര മര്യാദകളെയും വെല്ലുവിളിക്കുന്നതാണ്.
ഇന്ത്യയിലെ അന്വേഷണ ഏജൻസികൾ കൊടുംഭീകരനായി പ്രഖ്യാപിക്കുകയും യുഎപിഎ (UAPA) പ്രകാരം കേസെടുക്കുകയും ചെയ്ത പിടികിട്ടാപ്പുള്ളിയാണ് നിരോധിത സംഘടനയായ ‘സിഖ്സ് ഫോർ ജസ്റ്റിസ്’ (SFJ) തലവൻ ഗുർപത്വന്ത് സിങ് പന്നൂൻ. ഇന്ത്യൻ വിമാനങ്ങൾ തകർക്കുമെന്നും പാർലമെന്റ് ആക്രമിക്കുമെന്നും പരസ്യമായി ഭീഷണി മുഴക്കുന്ന ഈ ഭീകരന് ‘അഭിപ്രായ സ്വാതന്ത്ര്യത്തിന്റെ’ പേരിൽ അമേരിക്കൻ മണ്ണിൽ സംരക്ഷണം നൽകുന്നതിന് പുറമെയാണ്, ഇന്ത്യയുടെ ഉന്നത സുരക്ഷാ ഉദ്യോഗസ്ഥരെ നിയമക്കുരുക്കിൽ പെടുത്താനുള്ള ഈ നീക്കം.
സാധാരണഗതിയിൽ വിദേശ കോടതികളുടെ രേഖകൾ കൈമാറേണ്ടത് ഇന്ത്യയുടെ കേന്ദ്ര അതോറിറ്റിയായ നിയമ മന്ത്രാലയം വഴിയാണ്. എന്നാൽ നയതന്ത്ര മാർഗ്ഗങ്ങളിലൂടെയുള്ള നീക്കം ഇന്ത്യ തള്ളിക്കളഞ്ഞതോടെയാണ്, ഹേഗ് കൺവെൻഷനിലെ ആർട്ടിക്കിൾ 19-ന്റെ മറവിൽ ദില്ലിയിലെ പട്യാല ഹൗസ്, ദ്വാരക, തീസ് ഹസാരി കോടതികൾ വഴി നേരിട്ട് സമൻസ് നൽകാൻ ജഡ്ജി കാതറിൻ പോൾക്ക് ഫെയ്ല ഉത്തരവിട്ടിരിക്കുന്നത്.
ഉന്നത സർക്കാർ പദവിയിലിരിക്കുന്ന ഉദ്യോഗസ്ഥർ ഔദ്യോഗിക കൃത്യനിർവ്വഹണത്തിന്റെ ഭാഗമായി ചെയ്യുന്ന കാര്യങ്ങൾക്ക് അന്താരാഷ്ട്ര നിയമപ്രകാരം ‘സോവറിൻ ഇമ്മ്യൂണിറ്റി’ (Sovereign Immunity – പരമാധികാര പരിരക്ഷ) ലഭ്യമാണ്. അതിനാൽ തന്നെ, അമേരിക്കൻ കോടതിയുടെ ഈ സമൻസിന് ഇന്ത്യയിൽ യാതൊരുവിധ നിയമപരമായ ബാധ്യതയുമില്ലെന്ന് നിയമവിദഗ്ധരും സർക്കാർ വൃത്തങ്ങളും വ്യക്തമാക്കുന്നു.
ഭീകരവാദത്തിനെതിരെ വിട്ടുവീഴ്ചയില്ലാത്ത പോരാട്ടം നയിക്കുന്ന അജിത് ദോവലിനെപ്പോലുള്ള ഉദ്യോഗസ്ഥരുടെ മനോവീര്യം തകർക്കാനുള്ള അന്താരാഷ്ട്ര ഗൂഢാലോചനയുടെ ഭാഗമാണ് ഈ കേസെന്ന് നിരീക്ഷകർ ചൂണ്ടിക്കാട്ടുന്നു. പന്നൂന്റെ ആരോപണങ്ങൾ തികച്ചും അടിസ്ഥാനരഹിതവും രാഷ്ട്രീയ പ്രേരിതവുമാണെന്ന് ഇന്ത്യ നേരത്തെ തന്നെ വ്യക്തമാക്കിയിട്ടുണ്ട്. സ്വന്തം രാജ്യത്തിന്റെ സുരക്ഷ ഉറപ്പാക്കുന്ന ഉദ്യോഗസ്ഥരെ വിദേശ കോടതികൾക്ക് മുന്നിൽ വിട്ടുകൊടുക്കില്ലെന്ന ഉറച്ച നിലപാടിലാണ് ഭാരതം.









