കൊല്ലം: പുനലൂർ നഗരമധ്യത്തിൽ നിർത്തിയിട്ടിരുന്ന പോലീസ് ജീപ്പിന്റെ ബോണറ്റിന് മുകളിൽ കയറിയിരുന്ന് പുകവലിച്ച യുവാവിനെ പോലീസ് പിടിച്ചിറക്കി വിട്ടു. പുനലൂർ സ്വദേശിയായ ഹരിലാലാണ് മദ്യലഹരിയിൽ പരസ്യമായി നിയമലംഘനം നടത്തിയത്. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ ഇതിനോടകം തന്നെ വൈറലായിട്ടുണ്ട്.
വെള്ളിയാഴ്ച ഉച്ചതിരിഞ്ഞ് പുനലൂർ ഗവൺമെന്റ് ഹയർ സെക്കൻഡറി സ്കൂളിന് സമീപത്തായിരുന്നു നാടകീയ രംഗങ്ങൾ അരങ്ങേറിയത്. നഗരമധ്യത്തിൽ നിർത്തിയിട്ടിരുന്ന പോലീസ് ജീപ്പിന്റെ ബോണറ്റിന് മുകളിലേക്ക് മദ്യലഹരിയിലായിരുന്ന ഹരിലാൽ കയറിയിരിക്കുകയായിരുന്നു. തുടർന്ന് യാതൊരു കൂസലുമില്ലാതെ സിനിമാ സ്റ്റൈലിൽ പുകവലിക്കാൻ തുടങ്ങിയതോടെ സ്ഥലത്ത് ആളുകൾ തടിച്ചുകൂടി.
തിരക്കേറിയ നഗരമധ്യത്തിൽ പോലീസ് വാഹനത്തിന് മുകളിൽ കയറിയിരുന്ന് യുവാവ് പുകവലിക്കുന്നത് ശ്രദ്ധയിൽപ്പെട്ട ഉടൻ തന്നെ ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥർ സ്ഥലത്തെത്തി. തുടർന്ന് ബലപ്രയോഗത്തിലൂടെ ഇയാളെ ജീപ്പിന്റെ മുകളിൽ നിന്നും താഴെയിറക്കി സ്ഥലത്തുനിന്ന് മാറ്റുകയായിരുന്നു.
പുനലൂർ പോലീസിന് സ്ഥിരം തലവേദന സൃഷ്ടിക്കുന്നയാളാണ് പിടിയിലായ ഹരിലാൽ എന്നാണ് വിവരം. ഇയാൾക്കെതിരെ മുൻപും സമാനമായ രീതിയിലുള്ള നിരവധി കേസുകൾ നിലവിലുണ്ട്. നഗരമധ്യത്തിലെ ഈ അപ്രതീക്ഷിത സംഭവം വഴിയാത്രക്കാരെയും നാട്ടുകാരെയും ഒരുപോലെ അമ്പരപ്പിച്ചു. സംഭവസ്ഥലത്തുണ്ടായിരുന്നവർ പകർത്തിയ വീഡിയോ ദൃശ്യങ്ങൾ വാട്സ്ആപ്പ്, ഫേസ്ബുക്ക് ഉൾപ്പെടെയുള്ള സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.









