ന്യൂഡൽഹി: ശബരിമല തീർഥാടനത്തിന് എത്തുന്ന അയ്യപ്പഭക്തർക്ക് ആശ്വാസവും സന്തോഷവും പകരുന്ന തീരുമാനവുമായി കേന്ദ്ര വ്യോമയാന മന്ത്രാലയം. വിമാന യാത്രയ്ക്കിടെ അയ്യപ്പഭക്തർക്ക് തങ്ങളുടെ ഇരുമുടിക്കെട്ട് ഹാൻഡ് ബാഗേജായി വിമാനത്തിന്റെ ക്യാബിനിൽ (Cabin) തന്നെ കൊണ്ടുപോകാൻ മന്ത്രാലയം അനുമതി നൽകി. തുടർച്ചയായ മൂന്നാം വർഷമാണ് തീർഥാടകർക്ക് ഈ പ്രത്യേക ഇളവ് നീട്ടി നൽകുന്നത്.
മണ്ഡല-മകരവിളക്ക് തീർഥാടന കാലയളവിലേക്കാണ് ഈ പ്രത്യേക അനുമതി ബാധകമാകുക. സാധാരണഗതിയിൽ സുരക്ഷാ കാരണങ്ങളാൽ തേങ്ങ പോലുള്ള വസ്തുക്കൾ വിമാനത്തിന്റെ ക്യാബിൻ ബാഗേജിൽ അനുവദിക്കാറില്ല. എന്നാൽ, അയ്യപ്പഭക്തരുടെ മതപരമായ വികാരങ്ങളും ആചാരങ്ങളും മാനിച്ചാണ് കേന്ദ്ര വ്യോമയാന മന്ത്രാലയം പ്രത്യേക ഉത്തരവിലൂടെ ഇളവ് അനുവദിച്ചിരിക്കുന്നത്.
തീർഥാടകർക്ക് വിമാനത്താവളങ്ങളിൽ യാതൊരുവിധ യാത്രാ തടസ്സങ്ങളും നേരിടുന്നില്ലെന്ന് ഉറപ്പാക്കണമെന്ന് ബ്യൂറോ ഓഫ് സിവിൽ ഏവിയേഷൻ സെക്യൂരിറ്റി (BCAS), കേന്ദ്ര വ്യവസായ സുരക്ഷാ സേന (CISF), വിമാനത്താവള അധികൃതർ എന്നിവർക്ക് മന്ത്രാലയം കർശന നിർദേശം നൽകിയിട്ടുണ്ട്. സുരക്ഷാ പരിശോധനകൾ കൃത്യമായി പൂർത്തിയാക്കിയ ശേഷമായിരിക്കും ഇരുമുടിക്കെട്ട് ക്യാബിനിൽ പ്രവേശിപ്പിക്കുക. ഇതര സംസ്ഥാനങ്ങളിൽ നിന്നും വിദേശ രാജ്യങ്ങളിൽ നിന്നും വിമാനമാർഗ്ഗം കേരളത്തിലേക്ക് എത്തുന്ന ലക്ഷക്കണക്കിന് അയ്യപ്പഭക്തർക്ക് വലിയ ആശ്വാസമാണ് കേന്ദ്ര സർക്കാരിന്റെ ഈ തീരുമാനം.












