പി.കെ ശശി എം.എല്‍.എയെയും , ഡി വൈ എഫ് ഐ നേതാവ് ജീവന്‍ലാലിനുമെതിരെ വാട്സ്ആപ്പില്‍ പരമാര്‍ശം നടത്തിയതിന്റെ പേരില്‍ നഗരസഭാ ജീവനക്കാരന് സസ്പെന്‍ഷന്‍ . കാഞ്ഞങ്ങാട് നഗരസഭയിലെ ഓഫീസ് അസിസ്റ്റന്റായ മുഹമ്മദ്‌ റിയാസിനെയാണ് തദ്ദേശസ്വയം ഭരണ വകുപ്പ് അന്വേഷണ വിധേയമായി സസ്പെന്ഡ് ചെയ്തത് .
മുഹമ്മദ്‌ റിയാസ് അഡ്മിന്‍ ആയിട്ടുള്ള ‘നഗരപാലിക’യെന്ന നഗരസഭയിലെ ജീവനക്കാരും , മുന്‍ ജീവനക്കാരും , കൌണ്‍സിലര്‍മാരും ഉള്‍പ്പെടുന്ന വാട്സ്ആപ്പ് ഗ്രൂപ്പിലാണ് എം.എല്‍.എയ്ക്കും , ജീവന്‍ലാലിനുമെതിരെ പോസ്റ്റ്‌ വന്നത് .
എം.എല്‍.എയ്ക്കും , ഡി.വൈ.എഫ്.ഐ നേതാവിനും എതിരെ ഉയര്‍ന്ന ലൈംഗീക പീഡനപരാതി സംബന്ധിക്കുന്ന സന്ദേശമാണ് ഗ്രൂപ്പില്‍ പ്രചരിപ്പിച്ചത് . പാര്‍ട്ടി നടത്തുന്ന അന്വേഷണത്തെ പറ്റിയും , മുഖ്യമന്ത്രിയെയും പരാമര്‍ശിച്ചിരുന്നു .
ഇതിനെതിരെ നഗരസഭാ ചെയര്‍മാന്‍ വിവി രമേശന്‍ തദ്ദേശ സ്വയംഭരണ വകുപ്പിന് പരാതി നല്‍കുകയായിരുന്നു . ജീവനക്കാരന് സര്‍വീസ് ചട്ടങ്ങള്‍ക്ക് വിരുദ്ധമായി പ്രവര്‍ത്തിച്ചുവെന്നാണ് പരാതിയില്‍ പറയുന്നത് . കൃത്യനിര്‍വഹണത്തില്‍ മുഹമ്മദ്‌ റിയാസ് നിരന്തരം വീഴ്ച്ച വരുത്തുന്നുണ്ടെന്നും പരാതിയില്‍ പറയുന്നു .
എന്നാല്‍ തനിക്ക് എതിരെയുള്ള ആരോപണങ്ങളും , നടപടിയും രാഷ്ട്രീയ ഗൂഢാലോചനയുടെ ഭാഗമാണെന്നു മുഹമ്മദ്‌ റിയാസ് പ്രതികരിച്ചു .
Discussion about this post