തിരുവനന്തപുരം:മുന്‍ ധനമന്ത്രി കെ.എം മാണിക്കെതിരായ ബാര്‍ കോഴക്കേസില്‍ തുടരന്വേഷണം വേണ്ടെന്ന് വിജിലന്‍സ് നിയമോപദേഷ്ടാവ്. തിരുവനന്തപുരം വിജിലന്‍സ് കോടതിയിലാണ് വിജിലന്‍സിന്റെ ലീഗല്‍ അഡൈ്വസര്‍ ഇക്കാര്യം അറിയിച്ചത്. മാണിയെ കുറ്റവിമുക്തനാക്കിയ റിപ്പോര്‍ട്ടില്‍ ഉറച്ചു നില്‍ക്കുന്നുവെന്നും പുതിയ തെളിവ് ലഭിച്ചാലേ തുടന്വേഷണത്തിന് സാധ്യതയുള്ളൂവെന്നും നിയമോപദേഷ്ടാവ് പറഞ്ഞു.
കേസില്‍ മാണിക്കെതിരേ അന്വേഷണം നടത്തിയ ശേഷം സമര്‍പ്പിച്ച ക്ലീന്‍ചിറ്റ് റിപ്പോര്‍ട്ടില്‍ വിജിലന്‍സ് ഉറച്ചു നില്‍ക്കുകയാണ്. തുടരന്വേഷണത്തിന്റെ ഒരു സാഹചര്യവും നിലവിലില്ല. പരാതിക്കാര്‍ ആരെങ്കിലും കൂടുതല്‍ തെളിവുകള്‍ നല്‍കിയാലോ പുതിയ സാഹചര്യങ്ങള്‍ വന്നെങ്കിലോ മാത്രം വീണ്ടും അന്വേഷണം മതിയെന്നാണ് ലീഗല്‍ അഡൈ്വസര്‍ നിലപാട് സ്വീകരിച്ചത്.
കേസില്‍ വിജിലന്‍സ് വീണ്ടും അന്വേഷണത്തിന് തയാറെടുക്കുന്നുവെന്ന് മാധ്യമ വാര്‍ത്തകള്‍ സാറാ ജോസഫിന്റെ അഭിഭാഷകന്‍ ചൂണ്ടിക്കാണിച്ചപ്പോഴാണ് കോടതി വിജിലന്‍സ് നിയമോപദേശകനോട് ഇക്കാര്യത്തില്‍ വിശദീകരണം തേടിയത്. തുടര്‍ന്നാണ് അദ്ദേഹം വിജിലന്‍സ് നിലപാട് അറിയിച്ചത്.
വിജിലന്‍സ് ഡയറക്ടര്‍ സ്ഥാനത്തേക്ക് ജേക്കബ് തോമസ് എത്തിയതിന് പിന്നാലെയാണ് ബാര്‍ കോഴക്കേസില്‍ വീണ്ടും അന്വേഷണം നടത്തുമെന്ന തരത്തില്‍ വാര്‍ത്തകള്‍ വന്നത്. കേസില്‍ കോടതി നിര്‍ദ്ദേശിച്ച എല്ലാ കാര്യങ്ങളും അന്വേഷിച്ചോ എന്ന് പരിശോധിക്കാന്‍ വിജിലന്‍സ് ഡയറക്ടര്‍ നിര്‍ദ്ദേശം നല്‍കിയെന്നും റിപ്പോര്‍ട്ടുകളുണ്ടായിരുന്നു. എന്നാല്‍ കോടതിയില്‍ വിജിലന്‍സ് നിയമോപദേശകന്റെ നിലപാട് ഡയറക്ടറുടെ നിലപാടിനോട് യോജിക്കുന്നതല്ല എന്നതാണ് ശ്രദ്ധേയം.
ഇതേസമയം വിഎസിന്റെയും വി മുരളീധരന്റെയും അഭിഭാഷകര്‍ തമ്മില്‍ വാക്കേറ്റമുണ്ടായി. ബാര്‍കോഴക്കേസ് പരിഗണിക്കുന്നതിനിടെയാണ് വാക്കേറ്റമുണ്ടായത്.
Discussion about this post