കോട്ടയം: കോട്ടയം ഗവണ്‍മെന്റ് മെഡിക്കല്‍ കോളജിലെ എംബിബിഎസ് കോഴ്‌സിന്റെ അംഗീകാരം മെഡിക്കല്‍ കൗണ്‍സില്‍ ഓഫ് ഇന്ത്യ(എംസിഐ) സസ്‌പെന്‍ഡ് ചെയ്തു. അടിസ്ഥാന സൗകര്യങ്ങളുടെയും അധ്യയന വിഭാഗത്തിന്റെയും അഭാവങ്ങള്‍ പരിഗണിച്ചാണ് എംസിഐ നടപടിയെന്നു ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നു. സംഭവത്തില്‍ മെഡിക്കല്‍ കോളജ് പ്രിന്‍സിപ്പലിനോട് എംസിഐ വിശദമായ റിപ്പോര്‍ട്ട് തേടിയിട്ടുണ്ട്.
ജൂലൈ 26, 27 തീയതികളില്‍ മെഡിക്കല്‍ കൗണ്‍സില്‍ ഓഫ് ഇന്ത്യ വിദഗ്ധ സംഘം കോട്ടയം മെഡിക്കല്‍ കോളജില്‍ പരിശോധന നടത്തിയിരുന്നു. ഇവര്‍ സമര്‍പ്പിച്ച റിപ്പോര്‍ട്ടിന്റെ അടിസ്ഥാനത്തിലാണു എംസിഐ നടപടി.
കേരള സര്‍വകലാശാലയുടെ ഹെല്‍ത്ത് സയന്‍സ് വിഭാഗത്തില്‍ എംബിബിഎസ് കോഴ്‌സിന് നല്‍കിയിരുന്ന അനുമതി തുടരാന്‍ എംസിഐ എക്‌സിക്യുട്ടിവ് കമ്മിറ്റി നിര്‍ദേശിക്കില്ല. ഒരു മാസത്തിനുള്ളില്‍ പോരായ്മകളും അഭാവങ്ങളും ചൂണ്ടിക്കാട്ടി റിപ്പോര്‍ട്ട് സമര്‍പ്പിക്കാന്‍ ഇന്‍സ്റ്റിറ്റ്യൂട്ടിനോടു നിര്‍ദേശിക്കുന്നു പ്രിന്‍സിപ്പലിനു കൈമാറിയ എംസിഐ ഉത്തരവില്‍ പറയുന്നു.
അതേസമയം, കോഴ്‌സിന്റെ അനുമതി റദ്ദു ചെയ്തതു സാങ്കേതിക പിഴവാണെന്നാണു ആരോഗ്യ അഡീഷണല്‍ ചീഫ് സെക്രട്ടറി രാജീവ് സദാനന്ദന്‍ പറയുന്നത്. വിശദീകരണ റിപ്പോര്‍ട്ട് സമര്‍പ്പിച്ചതിനുശേഷം എംസിഐ തീരുമാനം പുനഃപരിശോധിക്കുമെന്നാണു കരുതുന്നത്. മാത്രമല്ല, റിപ്പോര്‍ട്ടില്‍ ചൂണ്ടിക്കാട്ടിയിട്ടുള്ള അസൗകര്യങ്ങള്‍ സര്‍ക്കാര്‍ പരിഗണിക്കുകയും പരിഹരിക്കുകയും ചെയ്യും രാജീവ് സദാനന്ദന്‍ പറഞ്ഞു.
നിലവില്‍ 150 എംബിബിഎസ് സീറ്റുകളാണു കോട്ടയം മെഡിക്കല്‍ കോളജിനുള്ളത്. കോളജിന്റെ വിശദീകരണം മെഡിക്കല്‍ കൗണ്‍സില്‍ ഓഫ് ഇന്ത്യ തള്ളിയാല്‍ 50 സീറ്റുകള്‍ കോളജിനു നഷ്ടപ്പെടും. റിപ്പോര്‍ട്ട് സമര്‍പ്പിക്കപ്പെട്ട ശേഷം എംസിഐ ടീം വീണ്ടും പരിശോധനയ്‌ക്കെത്തുന്നുണ്ട്. ഇതിനുശേഷമാവും അന്തിമ തീരുമാനം കൈക്കൊള്ളുക.
Discussion about this post