ഡല്‍ഹി: രാഷ്ട്രീയ പ്രമേയത്തിന്മേലുള്ള തര്‍ക്കം വോട്ടെടുപ്പിലേക്ക് കടക്കാതിരിക്കാനുള്ള നീക്കം സിപിഎം കേന്ദ്ര കമ്മിറ്റിയില്‍ സജീവമായി. കോണ്‍ഗ്രസുമായി യാതൊരു ധാരണയും വേണ്ടെന്ന നിലപാടാണ് ഇന്നലെ കേന്ദ്ര കമ്മിറ്റിയില്‍ സംസാരിച്ച കേരളത്തില്‍ നിന്നുള്ള അംഗങ്ങള്‍ കൈക്കൊണ്ടത്. ഇ.പി. ജയരാജന്‍, എ.കെ. ബാലന്‍, എളമരം കരീം, എ. വിജയരാഘവന്‍ എന്നിവരാണ് സംസാരിച്ചത്.സീതാറാം യച്ചൂരിയുടെ നിലപാടിനെ ബംഗാള്‍, ത്രിപുര അംഗങ്ങള്‍ പിന്തുണച്ചു. സംസ്ഥാന സാഹചര്യങ്ങള്‍ക്കനുസരിച്ച് രാഷ്ട്രീയ നിലപാട് സ്വീകരിക്കണമെന്ന് ബംഗാള്‍ ഘടകം ആവശ്യപ്പെട്ടു. ത്രിപുര മുഖ്യമന്ത്രി മണിക് സര്‍ക്കാര്‍ സമവായ നീക്കങ്ങള്‍ നടത്തുമെന്ന സൂചനയുണ്ട്.
അതേസമയം സീതാറാം യച്ചൂരിയെ പിന്തുണച്ച് വി.എസ്.അച്യുതാനന്ദന്‍ കേന്ദ്ര കമ്മിറ്റിക്ക് കത്ത് നല്‍കി. രാഷ്ട്രീയപ്രമേയത്തില്‍ രണ്ട് രേഖകള്‍ വേണ്ടെന്ന കടുത്ത നിലപാടിലാണ് കാരാട്ട് പക്ഷം. അതിനിടെ, സമ്മര്‍ദനീക്കങ്ങളുടെ ഭാഗമായി യച്ചൂരി ബുദ്ധദേവ് ഭട്ടാചാര്യയോട് കേന്ദ്ര കമ്മിറ്റിയില്‍ പങ്കെടുക്കണമെന്ന് ആവശ്യപ്പെട്ടു.
കോണ്‍ഗ്രസുമായി ഒരു ധാരണയും വേണ്ടെന്ന പിബി അംഗീകരിച്ച രേഖ പ്രകാശ് കാരാട്ട് കൊല്‍ക്കത്തയില്‍ പുരോഗമിക്കുന്ന സി സിയില്‍ അവതരിപ്പിച്ചു. കോണ്‍ഗ്രസുമായി നീക്കുപോക്കുകളാകാമെന്ന ന്യൂനപക്ഷ രേഖ യച്ചൂരിയും. യച്ചൂരിയുടെ രേഖ വോട്ടിനിട്ട് തള്ളുന്ന സാഹചര്യമുണ്ടാക്കാനാണ് കാരാട്ട് പക്ഷത്തിന്റെ നീക്കം. രേഖ ഒന്ന് മതി; വിയോജിപ്പുകള്‍ പാര്‍ട്ടി കോണ്‍ഗ്രസില്‍ ഉന്നയിക്കാമെന്നാണ് കാരാട്ട് പക്ഷത്തിന്റെ നിലപാട്.
ബിജെപി ഹിന്ദുത്വ ഫാസിസ്റ്റ് പാര്‍ട്ടിയാണെന്നും ബിജെപിയെ അധികാരത്തില്‍ നിന്ന് പുറത്താക്കാന്‍ പ്രായോഗിക രാഷ്ട്രീയ നിലപാട് വേണമെന്നുമാണ് വി എസ് കേന്ദ്ര കമ്മിറ്റിക്ക് അയച്ച കത്തിലുള്ളത്. കോണ്‍ഗ്രസ് സഹകരണത്തിന്റെ ശക്തനായ വക്താവും കാരാട്ട് വിരോധിയുമായ ബുദ്ധദേവ് ഭട്ടാചാര്യയെ സി സി യോഗത്തിനെത്തിക്കാനാണ് യച്ചൂരിയുടെ നീക്കം. അനാരോഗ്യം മൂലം ബുദ്ധദേവ് ഏറെ നാളായി കേന്ദ്ര കമ്മിറ്റിയില്‍ പങ്കെടുക്കാറില്ല.
Discussion about this post