ശബരിമല വിഷയത്തില്‍ സര്‍ക്കാരിനെതിരെ പരാമര്‍ശങ്ങളുന്നയിച്ച് എന്‍.എസ്.എസ്. സര്‍ക്കാര്‍ നിലവില്‍ ശബരിമല വിഷയത്തില്‍ രാഷ്ട്രീയ നേട്ടമുണ്ടാക്കാനാണ് ശ്രമിക്കുന്നതെന്ന് എന്‍.എസ്.എസ് പുറത്ത് വിട്ട വാര്‍ത്താക്കുറിപ്പില്‍ ആരോപിക്കുന്നു.
യുവതി പ്രവേശന വിഷയത്തിന് നവോത്ഥാനവുമായി യാതൊരു ബന്ധവുമില്ലെന്ന് വാര്‍ത്താക്കുറിപ്പില്‍ പറയുന്നു. സവര്‍ണ്ണനെന്നും അവര്‍ണ്ണനെന്നും വേര്‍തിരിവ് ഉണ്ടാക്കാനാണ് സര്‍ക്കാര്‍ ശ്രമിക്കുന്നതെന്നും ഈ നീക്കം വിജയിക്കില്ലെന്നും എന്‍.എസ്.എസ് പറഞ്ഞു. കൂടാതെ സര്‍ക്കാര്‍ ശബരിമലയില്‍ നവോത്ഥാനത്തിന്റെ പേരില്‍ നിരീശ്വരവാദം നടപ്പാക്കാനാണ് ശ്രമിക്കുന്നതെന്നും എന്‍.എസ്.എസ് പറഞ്ഞു.
ആചാരാനുഷ്ഠാനങ്ങളുടെയും വിശ്വാസങ്ങളുടെയും പ്രശ്‌നങ്ങളാണ് ശബരിമല യുവതി പ്രവേശനവുമായി ബന്ധപ്പെട്ട് നിലനിനല്‍ക്കുന്നതെന്ന് വാര്‍ത്താക്കുറിപ്പില്‍ പറയുന്നു. കേസ് ഉണ്ടായപ്പോള്‍ തന്നെ വിശ്വാസികളുടെ വിശ്വാസം സംരംക്ഷിക്കാന്‍ സര്‍ക്കാര്‍ തയ്യാറാവണമായിരുന്നുവെന്നും എന്‍.എസ്.എസ് പറയുന്നു. ദേവസ്വം ബോര്‍ഡിനെ ബന്ദിയാക്കി നിര്‍ത്തി വിശ്വാസങ്ങള്‍ക്കെതിരായുള്ള സത്യവാങ്മൂലം സര്‍ക്കാര്‍ നല്‍കിയതിനെ എന്‍.എസ്.എസ് വിമര്‍ശിച്ചു. ഈശ്വര വിശ്വാസികള്‍ക്കിടയില്‍ ജാതി സ്പര്‍ധ വളര്‍ത്തി രാഷ്ട്രീയ നേട്ടം കൊയ്യാമെന്ന് സര്‍ക്കാര്‍ കരുതണ്ടായെന്നും വാര്‍ത്താക്കുറിപ്പില്‍ പറയുന്നു.
ഇന്നലെ മുഖ്യമന്ത്രി പിണറായി വിജയന്‍ വിളിച്ച് ചേര്‍ത്ത നവോത്ഥാന സംഘടനകളുടെ യോഗത്തില്‍ നിന്നും എന്‍.എസ്.എസ് വിട്ടുനിന്നിരുന്നു.
Discussion about this post