കോഴിക്കോട്: ശബരിമല പ്രക്ഷോഭവുമായി ബന്ധപ്പെട്ടുള്ള മൂന്ന് കേസുകളില്‍ അറസ്റ്റ് വാറണ്ടുള്ള കോഴിക്കോട്ടെ എന്‍ഡിഎ സ്ഥാനാര്‍ത്ഥി പ്രകാശ് ബാബു ഇന്ന് കോടതിയില്‍ ഹാജരാകും. നേരത്തെ പ്രകാശ് ബാബുവിനെ പിടികിട്ടാപുള്ളിയായി പ്രഖ്യാപിച്ചിരുന്നു. ഇേേത തുടര്‍ന്നാണ് ഹാജാരായി ജാമ്യം തേടുന്നതിനായി പ്രകാശ് ബാബു കോടതിയില്‍ ഹാജരാവുക.
തെരഞ്ഞെടുപ്പില്‍ മത്സരിക്കാന്‍ പത്രിക നല്‍കണമെങ്കില്‍ ശബരിമല പ്രക്ഷോഭവുമായി ബന്ധപ്പെട്ട കേസുകളില്‍ പ്രകാശ് ബാബുവിന് ജാമ്യം കിട്ടണം. എന്നാല്‍, പ്രചാരണം നിര്‍ത്തിവയ്ക്കില്ലെന്ന് സ്ഥാനാര്‍ത്ഥി നേരത്തെ പറഞ്ഞിരുന്നു. ശബരിമല യുവതീപ്രവേശന പ്രതിഷേധങ്ങളുമായി ബന്ധപ്പെട്ട് എട്ട് കേസുകളാണ് പ്രകാശ് ബാബുവിന്റെ പേരിലുള്ളത്. ഇതില്‍ മൂന്നെണ്ണത്തില്‍ അറസ്റ്റ് വാറന്‍ഡ് പുറപ്പെടുവിച്ചിരുന്നു. അറസ്റ്റ് വാറന്‍ഡ് നിലനില്‍ക്കുന്നവര്‍ക്ക് പത്രിക നല്‍കാനാവില്ലെന്നാണ് തെരഞ്ഞെടുപ്പ് നിയമത്തില്‍ പറയുന്നത്.
ജാമ്യമില്ലാ വകുപ്പ് പ്രകാരം ചുമത്തപ്പെട്ട രണ്ട് കേസുകളില്‍ പത്രിക സമര്‍പ്പണത്തിന് മുന്‍പേ അതത് സ്റ്റേഷനുകളിലോ കോടതിയിലോ കീഴടങ്ങണം. എന്നാല്‍ മുന്‍കൂര്‍ ജാമ്യ ഹര്‍ജി കൊടുക്കാത്തതിനാല്‍ കീഴടങ്ങിയാല്‍ കോടതി ജയിലിലേക്ക് അയക്കുന്ന സാഹചര്യം ഒഴിവാക്കാനും നീക്കമുണ്ട്.
ശബരിമലയില്‍ കലാപത്തിന് ശ്രമിച്ചു, ചിത്തിര ആട്ട വിശേഷത്തിനിടെ സ്ത്രീയെ തടഞ്ഞു, ദേവസ്വം ബോര്‍ഡ് പ്രസിഡന്റിന്റെ വീട്ടിലേക്ക് നടത്തിയ മാര്‍ച്ചിനിടെ പൊലീസ് വാഹനങ്ങള്‍ തകര്‍ത്തു എന്നീ കേസുകളിലാണ് പ്രകാശ് ബാബുവിനെതിരെ അറസ്റ്റ് വാറന്‍ഡുകള്‍ വന്നിരിക്കുന്നത്. കേസുണ്ടെങ്കിലും യുവമോര്‍ച്ച സംസ്ഥാന അധ്യക്ഷന്‍ കോഴിക്കോട് പ്രചാരണവുമായി മുന്നോട്ട് പോവുകയാണ്.
ഇതിനിടെ ജയിലില്‍ കിടന്നാണെങ്കില്‍ അങ്ങനെയും തെരഞ്ഞെടുപ്പിനെ നേരിടാന്‍ പ്രകാശിനാവുമെന്ന് ബിജെപി സംസ്ഥാന അധ്യക്ഷന്‍ പി.എസ് ശ്രീധരന്‍പിള്ള പറഞ്ഞു. പ്രകാശ് ബാബു തന്ന മെത്സരിക്കുമെന്നും അദ്ദേഹം പറഞ്ഞു.
ശബരിമല പ്രക്ഷോഭം തെരഞ്ഞെടുപ്പില്‍ ബിജെപി വലിയ പ്രചാരണ വിഷയമാക്കുകയാണ്. ഇതിനിടെ സ്ഥാനാര്‍ത്ഥി തന്നെ നിയമകുരുക്കിലകപ്പെടുന്നത് ബിജെപി വോട്ടര്‍മാര്‍ക്ക് മുന്നില്‍ അവതരിപ്പിക്കു. ശബരിമലയില്‍ വിശ്വാസികള്‍ക്കൊപ്പം നിന്നത് ബിജെപിയാണെന്ന വാദത്തിന് ഇത് ശക്തി പകരുകയും ചെയ്യും.
Discussion about this post