ന്യൂഡൽഹി; ചൈനീസ് മൊബൈൽ ഫോണുകൾ ഉപയോഗിക്കുന്നത് സൈനികരും കുടുംബാംഗങ്ങളും കഴിവതും ഒഴിവാക്കണമെന്ന ഉപദേശവുമായി ഡിഫൻസ് ഇന്റലിജൻസ് വിഭാഗം. ചൈനീസ് മൊബൈൽ ഫോണുകൾ സുരക്ഷാഭീഷണി ഉയർത്തുന്നുവെന്ന വിലയിരുത്തലിനെ തുടർന്നാണ് നിർദ്ദേശം.
ഇന്ത്യയുമായി ശത്രുതയുളള രാജ്യങ്ങൾ ഉൽപാദിപ്പിക്കുന്ന മൊബൈൽ ഫോണുകൾ വാങ്ങി ഉപയോഗിക്കുന്നതിൽ നിന്നും സൈനികരെയും കുടുംബാംഗങ്ങളെയും നിരുത്സാഹപ്പെടുത്തണമെന്നാണ് ഡിഫൻസ് ഇന്റലിജൻസ് ഏജൻസികൾ നൽകുന്ന മുന്നറിയിപ്പ്. വാർത്താ ഏജൻസിയായ എഎൻഐ ആണ് ഇക്കാര്യം റിപ്പോർട്ട് ചെയ്തത്. റിപ്പോർട്ടുകളുടെ പകർപ്പുകൾ ലഭ്യമാണെന്നും ഏജൻസി അവകാശപ്പെടുന്നു.
ചൈനീസ് മൊബൈൽ ഫോണുകളിൽ ചാര സോഫ്റ്റ്വെയറുകളും വൈറസ് പ്രോഗ്രാമുകളും ഉൾപ്പെടെ കണ്ടെത്തിയിട്ടുണ്ടെന്ന് റിപ്പോർട്ടുകളിൽ ഡിഫൻസ് ഇന്റലിജൻസ് ഏജൻസികൾ ചൂണ്ടിക്കാട്ടുന്നു.
ചൈനീസ് മൊബൈൽ ഫോണുകളിലെ ആപ്ലിക്കേഷനുകളാണ് കൂടുതൽ ഭീഷണി ഉയർത്തുന്നത്. ഭീഷണിയുളള ആപ്ലിക്കേഷനുകൾ ഡിലീറ്റ് ചെയ്യണമെന്നും ഡിഫൻസ് ഇന്റലിജൻസ് നിർദ്ദേശം നൽകുന്നുണ്ട്.
പത്തോളം ചൈനീസ് മൊബൈൽ ബ്രാൻഡുകളാണ് ഇന്ത്യൻ വിപണിയിൽ ഉളളത്.
Discussion about this post