“അന്നും ഇതേ പോലെ തിരഞ്ഞിരുന്നെങ്കില്‍ എന്റെ മകളേയും……,” ; അബിഗേലിനെ തിരികെ കിട്ടിയതില്‍ സന്തോഷം പ്രകടിപ്പിച്ച് ജസ്‌നയുടെ പിതാവ്

കോട്ടയം: കൊല്ലം പൂയപ്പള്ളിയില്‍ അജ്ഞാതര്‍ തട്ടിക്കൊണ്ടുപോയ ആറു വയസുകാരി അബിഗേല്‍ സാറാ റെജിയെ കണ്ടെത്തിയതില്‍ സന്തോഷം പ്രകടിപ്പിച്ച് എരുമേലിയില്‍ കാണാതായ ജസ്നയുടെ പിതാവ് ജെയിംസ്. കുട്ടിയെ കാണാതായപ്പോള്‍ മുതല്‍ പ്രാര്‍ത്ഥനയിലായിരുന്നുവെന്നും തിരികെ കിട്ടിയതില്‍ സന്തോഷമുണ്ടെന്നും അദ്ദേഹം പറഞ്ഞു.

“കൊച്ചിനെ കാണാതായി എന്നറിഞ്ഞ ആ സമയം ഞാന്‍ എന്റെ മകള്‍ ജസ്നയെ ഓര്‍ത്തു. രാത്രി മുഴുവന്‍ ആ വിഷമത്തിലായിരുന്നു. ഒട്ടും ഉറങ്ങിയില്ല. മുഴുവന്‍ സമയവും ഞാന്‍ ടി.വി കണ്ടു കൊണ്ടിരുന്നു. കൊച്ചിനെ തിരിച്ചുകിട്ടണേയെന്ന പ്രാര്‍ത്ഥനയിലായിരുന്നു. പിറ്റേന്ന് ഉച്ചയ്ക്ക് ഭക്ഷണം കഴിക്കുമ്പോഴാണ് കുട്ടിയെ തിരിച്ചു കിട്ടിയെന്ന് അറിഞ്ഞത്. വളരെയധികം സന്തോഷമുണ്ട്”, ജെയിംസ് വ്യക്തമാക്കി.

വ്യാജവാര്‍ത്തകളൊന്നും പുറത്ത് വിടാതെ കൃത്യമായ അന്വേഷണം നടത്തി. കേരളം ഒന്നിച്ച് ഒറ്റക്കെട്ടായി ആ കൊച്ചിന് വേണ്ടി പ്രാര്‍ത്ഥിക്കുകയും അന്വേഷിക്കുകയും ചെയ്തതിന്റെ ഫലമായിട്ടാണ് കൊച്ചിനെ കിട്ടിയത്. പക്ഷെ ഇതുപോലൊരു അന്വേഷണം അന്ന് ജസ്നയുടെ കാര്യത്തില്‍ ഉണ്ടായില്ല. അന്ന് ഒരുപാട് വ്യാജവാര്‍ത്തകള്‍ വരികയും അന്വേഷണം വഴി തെറ്റിക്കുകയും ചെയ്തു. അതുകൊണ്ടാണ് നമുക്ക് ഇതുവരെ ജസ്നയെ കിട്ടാതെ പോയതെന്നും പിതാവ് ജെയിംസ് ചൂണ്ടിക്കാട്ടി.

ആ വീട്ടുകാരുടെ നമ്പറുണ്ടേല്‍ ഞാന്‍ വിളിക്കും. അവരെ കാണാന്‍ പോകാനിരിക്കുകയാണ്. ഇതേ അവസ്ഥയിലൂടെ കടന്നു പോയവര്‍ക്ക് മാത്രമേ ആ വേദന എന്താണെന്ന് മനസിലാകൂ. അല്ലാത്തവര്‍ പുറത്ത് നിന്ന് വിമര്‍ശനങ്ങളും അവരവരുടെ ഭാവനയ്ക്കൊപ്പിച്ച് കഥകളും മെനയും. അതാണ് ജസ്നയ്ക്ക് സംഭവിച്ചത്, അദ്ദേഹം കൂട്ടിച്ചേര്‍ത്തു.

2018 മാര്‍ച്ച് 22-നാണ് എരുമേലി വെച്ചൂച്ചിറ സ്വദേശി ജസ്ന ജെയിംസിനെ കാണാതാകുന്നത്. ബന്ധുവീട്ടിലേക്ക് പോവുകയാണ് എന്നു പറഞ്ഞു വീട്ടില്‍നിന്ന് ഇറങ്ങിയ ജസ്നയെ പിന്നീട് കാണാതാവുകയായിരുന്നു. വീട്ടില്‍ നിന്നും ഓട്ടോയില്‍ മുക്കൂട്ടുതറയില്‍ എത്തിയതിനും കൂട്ടുതറയില്‍ നിന്ന് ബസ്സില്‍ എരുമേലി എത്തിയതിനും പോലീസിന് തെളിവു ലഭിച്ചിരുന്നു. എന്നാല്‍ പിന്നീട് എങ്ങോട്ട് പോയി എന്ന് ഇന്നും ആര്‍ക്കും അറിയില്ല.

ലോക്കല്‍ പോലീസും ക്രൈം ബ്രാഞ്ചും അന്വേഷിച്ചിട്ടും ഒരു ഫലവും ഉണ്ടായില്ല. പിന്നീട് 2021 ഫെബ്രുവരിയില്‍ ജസ്ന കേസ് സി.ബി.ഐ. ഏറ്റെടുത്തു. സി.ബി.ഐ. തിരുവനന്തപുരം യൂണിറ്റാണ് നിലവില്‍ ജസ്നയുടെ തിരോധാനം അന്വേഷിക്കുന്നത്. കൊല്ലത്തെ അബിഗേലിനെ പോലെ തന്റെ മകളും തിരിച്ചുവരും എന്ന വിശ്വാസത്തിലാണ് ജീവിക്കുന്നതെന്നും ആ പിതാവ് പ്രതികരിച്ചു.