ലക്‌നൗ: രാമജന്മഭൂമി-തർക്കമന്ദിരകേസിലെ മുൻ അന്യായക്കാരനായ ഇഖ്ബാൽ അൻസാരി ശ്രീരാമ ക്ഷേത്രത്തിന്റെ ചെറുരൂപവുമായി നിൽക്കുന്ന ചിത്രങ്ങൾ ചർച്ചയാവുന്നു. തന്റെ സഹായികളിലൊരാൾക്ക് സമ്മാനിക്കാനാണ് താൻ ക്ഷേത്രത്തിന്റെ മാതൃകരൂപം വാങ്ങിയതെന്ന് അദ്ദേഹം പറഞ്ഞു. അയോദ്ധ്യ പ്രാണപ്രതിഷ്ഠ ചടങ്ങിൽ പങ്കെടുക്കാൻ ഇഖ്ബാൽ അൻസാരിയെ ക്ഷേത്രട്രസ്റ്റ് ക്ഷണിച്ചിരുന്നു.
ഞാൻ അയോദ്ധ്യക്കാരനാണ്. ശ്രീരാമക്ഷേത്രം പൂർത്തിയായി കഴിഞ്ഞു. എല്ലാ പ്രതിപക്ഷ പാർട്ടികളും ഇതിനെ എതിർക്കുന്നു. എന്നാൽ ഞങ്ങൾ അതിനെ എതിർക്കുന്നില്ല. ഞങ്ങൾ വ്യക്തമായി പറയുന്നു. അയോദ്ധ്യയിൽ വന്ന് പുണ്യസ്‌നാനം നടത്തൂ. സരയൂനദി നിങ്ങളുടെ മനസും ശരീരവും ശുദ്ധീകരിക്കുമെന്ന് അദ്ദേഹം പറഞ്ഞു.
പ്രാണ പ്രതിഷ്ഠ നടക്കാൻ പോകുകയാണ്. അതിനെ എതിർക്കേണ്ട കാര്യമില്ല. ആളുകൾ അവരുടെ ജീവിതത്തിൽ എന്ത് ചെയ്താലും ഭഗവാന്റെ മുന്നിൽ കണക്ക് ബോധിപ്പിക്കുകയും അനുഗ്രഹം വാങ്ങുകയും ചെയ്യേണ്ടി വരുമെന്ന് അദ്ദേഹം പറഞ്ഞു.
നേരത്തെ രാമക്ഷേത്ര ഉദ്ഘാടന ചടങ്ങിൽ പങ്കെടുക്കാനുള്ള ഔപചാരിക ക്ഷണക്കത്ത് പിടിച്ചുനിൽകുന്ന ഇഖ്ബാൽ അൻസാരിയുടെ ചിത്രം വൈറലായിരുന്നു.2020 ഓഗസ്റ്റ് 5ന് നടന്ന രാമക്ഷേത്രത്തിന്റെ ‘ഭൂമിപൂജൻ’ ചടങ്ങിൽ പങ്കെടുക്കാനുള്ള ക്ഷണവും ഇഖ്ബാൽ അൻസാരിക്ക് ലഭിച്ചിരുന്നു.
Discussion about this post