ന്യൂഡൽഹി: ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കും പ്രതിപക്ഷ എംപിമാർക്കും കൂടിക്കാഴ്ചയ്ക്ക് അനുമതി നിഷേധിച്ച സംഭവത്തിൽ വ്യക്തത വരുത്തി തെരഞ്ഞെടുപ്പ് കമ്മീഷൻ. കൂടിക്കാഴ്ചയ്ക്കായി മുൻകൂട്ടി അനുമതി തേടിയിരുന്നില്ലെന്നും, പ്രോട്ടോക്കോൾ വിരുദ്ധമായ ആവശ്യങ്ങളാണ് കോൺഗ്രസിന്റെ ഭാഗത്തുനിന്നുണ്ടായതെന്നും തെരഞ്ഞെടുപ്പ് കമ്മീഷൻ പുറത്തിറക്കിയ വാർത്താക്കുറിപ്പിൽ വ്യക്തമാക്കി.
ഇന്ന് വൈകിട്ട് നാല് മണിക്ക് കമ്മീഷനെ കാണണമെന്നാണ് പ്രതിപക്ഷം ആവശ്യപ്പെട്ടിരുന്നത്. എന്നാൽ ഇതിനായി കൃത്യമായ നടപടിക്രമങ്ങൾ പാലിച്ചില്ലെന്നാണ് തെരഞ്ഞെടുപ്പ് കമ്മീഷന്റെ വിശദീകരണം. കൂടാതെ, പാർലമെന്റ് അനെക്സിൽ ഒന്നിച്ചിരിക്കുന്ന 240 പ്രതിപക്ഷ എംപിമാരെ കാണാനായി തെരഞ്ഞെടുപ്പ് കമ്മീഷൻ അംഗങ്ങൾ അങ്ങോട്ട് ചെല്ലണമെന്ന് കോൺഗ്രസ് ആവശ്യപ്പെടുകയായിരുന്നു. ഒരു ഭരണഘടനാ സ്ഥാപനത്തെ സംബന്ധിച്ചിടത്തോളം ഇത് തികച്ചും പ്രോട്ടോക്കോൾ വിരുദ്ധമാണെന്ന് ചൂണ്ടിക്കാട്ടിയാണ് തെരഞ്ഞെടുപ്പ് കമ്മീഷൻ ഈ ആവശ്യം നിരസിച്ചത്.
സാധാരണയായി തെരഞ്ഞെടുപ്പ് കമ്മീഷന്റെ ഡൽഹിയിലെ ആസ്ഥാനത്താണ് ഇത്തരം കൂടിക്കാഴ്ചകൾ സംഘടിപ്പിക്കാറുള്ളതെന്നും അതിന് യാതൊരുവിധ തടസ്സങ്ങളുമില്ലെന്നും വാർത്താക്കുറിപ്പിൽ കമ്മീഷൻ വ്യക്തമാക്കി. പ്രതിപക്ഷവുമായി സംസാരിക്കാൻ മുതിർന്ന ഉദ്യോഗസ്ഥനെ അയക്കാമെന്ന അസാധാരണ നടപടിക്ക് കമ്മീഷൻ തയ്യാറായെങ്കിലും ഈ നിർദ്ദേശം രാഹുൽ ഗാന്ധിയും മറ്റ് നേതാക്കളും സ്വീകരിക്കാൻ തയ്യാറായില്ലെന്നും വാർത്താക്കുറിപ്പിൽ പറയുന്നു.
അതേസമയം, ജനപ്രതിനിധികളുടെ ആവശ്യങ്ങളോട് ഭരണഘടനാ സ്ഥാപനങ്ങൾ മുഖം തിരിക്കുകയാണെന്ന് ആരോപിച്ച് രാഹുൽ ഗാന്ധിയുടെ നേതൃത്വത്തിൽ പ്രതിപക്ഷ എംപിമാർ ഡൽഹിയിൽ ശക്തമായ പ്രതിഷേധ സമരം തുടരുകയാണ്.
