ഡല്‍ഹി: കേരളത്തിലെ സിപിഎം അക്രമത്തിന്റെ പേരില്‍ ബിജെപി ഇന്ന് സിപിഎം ആസ്ഥാനമായ എ.കെ.ജി ഭവനിലേക്ക് പ്രതിഷേധ മാര്‍ച്ച് നടത്തി. പൊലീസ് തീര്‍ത്ത ബാരിക്കേടുകള്‍ മറികടന്ന് പ്രവര്‍ത്തകര്‍ എകെജി ഭവനിലേക്ക് കുതിച്ചു. നൂറു കണക്കിന് പ്രവര്‍ത്തകരാണ് പ്രകടനത്തില്‍ പങ്കെടുത്തത്. രാവിലെ പത്ത് മണിക്ക് ബിജെപി ആസ്ഥാനത്തുനിന്നു മാര്‍ച്ച് ആരംഭിച്ചു. മുതിര്‍ന്ന ബിജെപി നേതാക്കള്‍ മാര്‍ച്ചില്‍ പങ്കെടുത്തു. എകെജി ഭവനുസമീപം പൊലീസ് ശക്തമായ കാവല്‍ എര്‍പ്പെടുത്തിയിരുന്നു. ജലപീരങ്കി അടക്കമുള്ള സുരക്ഷാ സംവിധാനം ഒരുക്കിയിരുന്നു. അതേസമയം ഞായറാഴ്ചയാണെങ്കിലും എകെജി ഭവനിലെത്താന്‍ ഡല്‍ഹിയിലുള്ള നേതാക്കള്‍ക്ക് സിപിഎം സെക്രട്ടറി സീതാറാം യെച്ചൂരി നിര്‍ദേശം നല്‍കിയിട്ടുണ്ടായിരുന്നു.
കേരളത്തില്‍ പ്രത്യേകിച്ച് കണ്ണൂരില്‍ ബിജെപിക്കെതിരെ നടക്കുന്ന അക്രമങ്ങള്‍ വച്ചുപൊറുപ്പിക്കില്ലെന്ന് കേന്ദ്രമന്ത്രി രവിശങ്കര്‍ പ്രസാദ് പറഞ്ഞിരുന്നു. സി.പി.എം ഉടന്‍ അക്രമം നിര്‍ത്തിയില്ലെങ്കില്‍ തെരുവിലും, പാര്‍ലമെന്റിലും നേരിടുമെന്നും ഇന്ത്യ ഭരിക്കുന്നത് ബിജെപിയാണെന്ന് സിപിഎം ഒര്‍ക്കണമെന്നും രവിശങ്കര്‍ പ്രസാദ് മുന്നറിയിപ്പ് നല്‍കിയിരുന്നു.
അതേസമയം രവിശങ്കര്‍ പ്രസാദിന് മറുപടിയുമായി സിപിഎം പിബി അംഗം വൃന്ദ കാരാട്ട് രംഗത്തെത്തി. രാജ്യം ഭരിക്കുന്നത് ആര്‍.എസ്.എസ് അല്ല ഭരണ ഘടനയാണെന്ന് വൃന്ദ കാരാട്ട് പറഞ്ഞു. കോടിക്കണക്കിനു രൂപ ചിലവഴിച്ചിട്ടും കേരളത്തിലുണ്ടായ കനത്ത തോല്‍വിയുടെ നിരാശയിലാണ് ബിജെപി യെന്നും വൃന്ദ കാരാട്ട് പറഞ്ഞു
Discussion about this post