തിരുവനന്തപുരം: ടൈറ്റാനിയം ഫാക്ടറിയിൽ നിന്നും ഫർണസ് ഓയിൽ ചോർന്ന് കടലിലേക്ക് പരന്നു. ഇതിനെ തുടർന്ന് ശംഖുമുഖം, വേളി കടൽത്തീരങ്ങളിൽ പൊതുജനങ്ങൾക്ക് പ്രവേശനത്തിന് വിലക്ക് ഏർപ്പെടുത്തി. ഫാക്ടറിയിലെ ഗ്ലാസ് ഫർണസ് പൈപ്പ് പൊട്ടിയാണ് ഫർണസ് ഓയിൽ പുറത്തേക്കൊഴുകിയത്.
മേഖലയിൽ രണ്ടു മാസത്തോളം മത്സ്യബന്ധനം സാദ്ധ്യമായിരിക്കില്ലെന്ന് വി എസ് ശിവകുമാർ എംഎൽഎ പറഞ്ഞു. മേഖലയിലെ എണ്ണ പടർന്ന മണൽ നീക്കം ചെയ്യാനുള്ള നടപടികൾ പുരോഗമിക്കുകയാണ്.
ചോർച്ച അടച്ചതായി കമ്പനി അധികൃതർ അറിയിച്ചിട്ടുണ്ട്. മത്സ്യബന്ധന തൊഴിലാളികൾക്ക് നഷ്ടപരിഹാരം നൽകണമെന്ന ആവശ്യവും ശക്തമാണ്.
മലിനീകരണ നിയന്ത്രണ ബോർഡ് സംഭവ സ്ഥലത്തെത്തി പരിശോധന നടത്തിയിട്ടുണ്ട്. രണ്ടു കിലോമീറ്ററോളം ദൂരം എണ്ണ കടലിൽ പരന്നു. ഇന്ന് പുലർച്ചെയാണ് എണ്ണച്ചോർച്ച കണ്ടെത്തിയത്. വെട്ടുകാട് മുതൽ വേളി വരെയാണ് എണ്ണ പടർന്നിരിക്കുന്നത്.












