മലപ്പുറം: സമൂഹമാധ്യമങ്ങളിലെ കണ്ണഞ്ചിപ്പിക്കുന്ന പരസ്യങ്ങളിൽ വീണ് ഓൺലൈൻ വഴി വാങ്ങിയ ഫെയർനെസ് ക്രീം ഉപയോഗിച്ച 17-കാരിക്ക് ഗുരുതരമായ വൃക്കരോഗം ബാധിച്ചു. ഇൻസ്റ്റഗ്രാം ഇൻഫ്ലുവൻസർമാരുടെ വീഡിയോകൾ കണ്ടാണ് മലപ്പുറം സ്വദേശിനിയായ പെൺകുട്ടി നൈറ്റ് ക്രീം ഓർഡർ ചെയ്തത്. ക്രീമിൽ അപകടകരമായ അളവിൽ മെർക്കുറി അടങ്ങിയിട്ടുണ്ടെന്ന് ലാബ് പരിശോധനയിൽ സ്ഥിരീകരിച്ചതോടെ കമ്പനിക്കെതിരെ ഉപഭോക്തൃ കോടതിയെ സമീപിക്കാനൊരുങ്ങുകയാണ് കുടുംബം.
പതിനഞ്ച് ദിവസം കൊണ്ട് മുഖകാന്തി വർദ്ധിപ്പിക്കുമെന്നും മുഖക്കുരുവും കരുവാളിപ്പും പൂർണ്ണമായി മാറ്റുമെന്നുമായിരുന്നു ഇൻസ്റ്റഗ്രാമിലൂടെ കമ്പനി നടത്തിയിരുന്ന പ്രധാന വാഗ്ദാനം. ഇത് വിശ്വസിച്ചാണ് പെൺകുട്ടി ക്രീം വാങ്ങി ഉപയോഗിച്ചു തുടങ്ങിയത്. ആദ്യ ബോട്ടിൽ ഉപയോഗിച്ചപ്പോൾ നിറം വെക്കുന്നതായും നല്ല മാറ്റമുള്ളതായും തോന്നിയതോടെ കൂടുതൽ ബോട്ടിലുകൾ വാങ്ങി തുടർച്ചയായി ഉപയോഗിക്കുകയായിരുന്നു.
എന്നാൽ ദിവസങ്ങൾക്കുള്ളിൽ പെൺകുട്ടിക്ക് ശാരീരിക അസ്വസ്ഥതകൾ അനുഭവപ്പെടാൻ തുടങ്ങി. തുടർന്ന് നടത്തിയ വിശദമായ വൈദ്യപരിശോധനയിലാണ് വൃക്കകൾക്ക് ഗുരുതരമായ തകരാർ സംഭവിച്ചതായി കണ്ടെത്തിയത്. ഇതിന് പിന്നാലെ ക്രീം ലാബിൽ പരിശോധനയ്ക്ക് അയച്ചപ്പോഴാണ് ഞെട്ടിക്കുന്ന വിവരം പുറത്തുവന്നത്. അനുവദനീയമായതിലും എത്രയോ മടങ്ങ് അധികമായി 1.25 ശതമാനം മെർക്കുറിയാണ് ഈ ക്രീമിൽ അടങ്ങിയിട്ടുള്ളതെന്ന് പരിശോധനയിൽ വ്യക്തമായി.
സംഭവത്തെക്കുറിച്ച് ക്രീം നിർമ്മാതാക്കളോട് പരാതിപ്പെട്ടെങ്കിലും കമ്പനി അധികൃതർ ഇത് ഗൗനിക്കാനോ പ്രതികരിക്കാനോ തയ്യാറായില്ല. ഇതോടെയാണ് നീതി തേടി ഉപഭോക്തൃ കോടതിയെയും മറ്റ് നിയമവഴികളെയും സമീപിക്കാൻ 17-കാരിയും കുടുംബവും തീരുമാനിച്ചത്. അംഗീകാരമില്ലാത്തതും രാസവസ്തുക്കൾ അമിതമായി അടങ്ങിയതുമായ ഇത്തരം സൗന്ദര്യവർദ്ധക വസ്തുക്കൾ ഓൺലൈൻ പരസ്യങ്ങൾ കണ്ട് വാങ്ങി ഉപയോഗിക്കരുതെന്ന് ആരോഗ്യവിദഗ്ധരും മുന്നറിയിപ്പ് നൽകുന്നു.












