കണ്ണൂർ: പദവികൾക്ക് വേണ്ടി സ്തുതിവാചകങ്ങൾ എഴുതേണ്ടവരല്ല സാഹിത്യകാരന്മാരെന്ന് എഴുത്തുകാരൻ സി വി ബാലകൃഷ്ണൻ. അവനവന്റെ അന്തസ്സ് ശിരച്ഛേദംചെയ്ത് പാര്ട്ടി കോണ്ഗ്രസില് ആശംസ നേരുന്നതല്ല എഴുത്തുകാരന്റെ സാമൂഹിക പ്രതിബദ്ധതയെന്നും അദ്ദേഹം പറഞ്ഞു. പയ്യന്നൂര് സര്ഗജാലകത്തിന്റെ നേതൃത്വത്തില് സംഘടിപ്പിച്ച ‘സി.വി.: എഴുത്തിലെ 57 ആണ്ടുകള്’ സംവാദത്തില് സംസാരിക്കുകയായിരുന്നു അദ്ദേഹം.
മനുഷ്യരെന്ന നിലയ്ക്കും എഴുത്തുകാരെന്ന നിലയ്ക്കും കാണിച്ചിട്ടുള്ള സത്യസന്ധതയിലേക്കാണ് നാം എത്തിപ്പെടേണ്ടത്. സാഹിത്യനഭസ്സില് തിളങ്ങുന്ന നക്ഷത്രങ്ങള് കുറച്ചേയുള്ളൂ. ബാക്കിയുള്ളതൊക്കെയും കരിക്കട്ടകളാണ്. ചുറ്റും കാണുന്ന കാര്യങ്ങളോട് സത്യസന്ധമായി പ്രതികരിക്കുകയും അവനവനെ വഞ്ചിക്കാതിരിക്കുകയും ചെയ്യുകയെന്നതാണ് എഴുത്തുകാരന്റെ ബാധ്യതയെന്നും അദ്ദേഹം പറഞ്ഞു.
എഴുത്തുകാരന് സാധ്യതകള് തേടുന്നത് ബാധ്യതകള് മറന്നുകൊണ്ടാകരുത്. പദവികളെമാത്രം ലക്ഷ്യംവെച്ച് അവനവനിലേക്ക് ചുരുങ്ങിപ്പോകുന്ന ദുര്യോഗം മാറേണ്ടതുണ്ട്. മുട്ടുകുത്തി നില്ക്കാന് പറഞ്ഞാല് നിലത്തിഴയുന്നവരായി എഴുത്തുകാര് മാറുന്നത് പരിതാപകരമാണെന്നും അദ്ദേഹം വ്യക്തമാക്കി.










