തിരുവനന്തപുരം: എൽഡിഎഫ് നിയമസഭാ കക്ഷി യോഗത്തിൽ സർക്കാരിനെതിരെ രൂക്ഷ വിമർശനവുമായി കെ.ബി.ഗണേശ്കുമാർ എം.എൽ.എ. പല വകുപ്പുകളിലും പ്രഖ്യാപനങ്ങൾ മാത്രമാണ് നടക്കുന്നത്, ഒന്നിനും ഫണ്ട് അനുവദിക്കുന്നില്ല. മന്ത്രിമാരുടേയും വകുപ്പുകളുടേയും പ്രവർത്തനം പോരായെന്നും ഗണേശ്കുമാർ അഭിപ്രായപ്പെട്ടു.
” എം.എൽ.എമാർക്ക് മണ്ഡലത്തിൽ നിൽക്കാനാകാത്ത സ്ഥിതിയാണ്. പ്രഖ്യാപനങ്ങൾ മാത്രം പോര. ഫണ്ട് അനുവദിക്കണം. ഇത്തരത്തിൽ പ്രവർത്തിക്കാനാകില്ല. ബജറ്റ് പ്രഖ്യാപനങ്ങളൊന്നും നടപ്പായില്ല. അടുത്ത ബജറ്റിലെങ്കിലും പരിഹാരം വേണം. പൊതുമരാമത്ത് വകുപ്പിന്റെ നേതൃത്വത്തിലുള്ള റോഡ് ജോലികൾക്ക് കാലതാമസം നേരിടുകയാണ്. മന്ത്രി നല്ലതാണെങ്കിലും വിദ്യാഭ്യാസ വകുപ്പിലും ഒന്നും നടക്കുന്നില്ലെന്നും” ഗണേശ്കുമാർ കുറ്റപ്പെടുത്തി.
ഗണേശിന്റെ അഭിപ്രായത്തോട് സിപിഎം എംഎൽഎമാർ വിയോജിപ്പ് അറിയിച്ചു. എന്നാൽ തന്റെ അഭിപ്രായം എവിടേയും പറയുമെന്ന് ഗണേശ് തിരിച്ചടിച്ചു. പറയാനുള്ള കാര്യങ്ങൾ ഈ വേദിയിൽ അല്ലാതെ എവിടെ പറയുമെന്നും ഗണേശ് ചോദിച്ചു. സിപിഐ എംഎൽഎമാരും പി.വി.ശ്രീനിജൻ എംഎൽഎയും ഗണേശിനെ പിന്തുണച്ച് രംഗത്തെത്തി.












