തിരുവനന്തപുരം: കർഷകരുടെ സംഘം ഇസ്രയേലിലേക്ക് തിരിച്ചു. കാർഷിക രംഗത്തെ മാറ്റങ്ങളും ആധുനികവത്കരണവും പഠിക്കുകയാണ് ലക്ഷ്യം. 31 അംഗ സംഘത്തിൽ 27 പേർ കർഷകരാണ്. കൃഷി വകുപ്പ് സെക്രട്ടറി ബി.അശോകാണ് സംഘത്തെ നയിക്കുന്നത്. ജല മാനേജ്മെന്റ്, റീ സൈക്ലിംഗ് സാദ്ധ്യതകൾ, മൈക്രോ ഇറിഗേഷൻ എന്നിവയിലെ ഇസ്രയേൽ സാങ്കേതിക വിദ്യകൾ പഠിക്കും. ഒരാഴ്ചയിലധികം നീണ്ടു നിൽക്കുന്നതാണ് യാത്ര.
ഇസ്രായേലിയൻ സാങ്കേതിക വിദ്യകൾ മനസ്സിലാക്കി അത് ഇവിടത്തെ കൃഷിയിടങ്ങളിൽ പ്രായോഗികമാക്കുന്നതിന് താല്പര്യമുള്ള കർഷകരെ തെരഞ്ഞെടുത്താണ് ഇസ്രയേലിലേക്ക് അയച്ചിരിക്കുന്നത്. വാട്ടർ മാനേജ്മെന്റ്, റീസൈക്ലിങ് ടെക്നിക്കുകൾ, മൈക്രോ ഇറിഗേഷൻ സിസ്റ്റം, കാലാവസ്ഥ അനുരൂപ കൃഷി മാതൃകകൾ,ഹൈടെക് കൃഷി രീതികൾ, പോളി ഹൗസ് എന്നീ മേഖലകളിലെ ഇസ്രായേൽ സാങ്കേതികവിദ്യകൾ പ്രസിദ്ധമാണ്. ഇത്തരം സാങ്കേതികവിദ്യകൾ നേരിട്ടു കണ്ടു മനസ്സിലാക്കുന്നതിനും പഠിക്കുന്നതിനും ഉള്ള അവസരത്തിന് വേണ്ടിയാണ് യാത്രയെന്നും ഉദ്യോഗസ്ഥർ പറയുന്നു.
നേരത്തെ മന്ത്രി ബി.പ്രസാദും സംഘത്തിൽ ഉണ്ടാകുമെന്ന് പ്രഖ്യാപിച്ചെങ്കിലും പിന്നീട് പിന്മാറുകയായിരുന്നു. ഔദ്യോഗികമായി അറിയിക്കാതെ യാത്ര നിശ്ചയിച്ചതിൽ സിപിഐ കടുത്ത അതൃപ്തി പ്രകടിപ്പിച്ചിരുന്നു. വലിയ തോതിൽ മന്ത്രിക്കെതിരെ വിമർശനം ഉയർന്നതിന് പിന്നാലെയായിരുന്നു പിന്മാറ്റം.












