കാസർകോട്: പരിപാടിക്ക് മണിക്കൂറുകൾക്ക് മുൻപ് പിരിച്ചെടുത്ത പണവുമായി സംഘാടകർ മുങ്ങി. കാസർകോട് ഇളമ്പച്ചി മിനി സ്റ്റേഡിയത്തിലാണ് നാടകീയരംഗങ്ങൾ. സംഘാടകർ ടിക്കറ്റ് തുകയ്ക്കായി പിരിച്ചെടുത്ത 8 ലക്ഷം രൂപയുമായി മുങ്ങിയതെങ്കിലും വേദിയിലെത്തിയ കലാകാരന്മാർ പ്രതിഫലം ഇല്ലാതെ പരിപാടി അവതരിപ്പിക്കുകയായിരുന്നു.
കലാപരിപാടി അവതരിപ്പിക്കാനായി കണ്ണൂർ ഷരീഫ്, രഹന, കൊല്ലം ഷാഫി തുടങ്ങിയ 12 ഗായകരും തൃശൂരിൽനിന്നുള്ള നൃത്തസംഘവും ഉൾപ്പെടെ 60 പേരാണ് പരിപാടിക്കായി എത്തിയത്. പരിപാടിക്ക് മുൻപേ ഓൺലൈനായി കേരളത്തിനകത്തും പുറത്തും നിന്നായി ടിക്കറ്റ് വിൽപ്പന നടത്തി. വെള്ളിയാഴ്ച രാവിലെ 10 മണിക്ക് പരിപാടി അവതരിപ്പിക്കുന്നവർക്ക് നിശ്ചയിച്ച തുക നൽകാമെന്ന് സംഘാടകർ ഉറപ്പു നൽകി.
എന്നാൽ പരിപാടി നടക്കേണ്ട ദിവസം 7 മണിയായിട്ടും സംഘാടകരെത്തിയില്ല. ഓഡിറ്റോറിയത്തിൽ ടിക്കറ്റ് വാങ്ങിയ 3,000 പേർ എത്തുകയും ചെയ്തു. കാണികൾ ബഹളം വച്ചതോടെ വലിയ സ്ക്രീനിൽ തട്ടിപ്പുകാരുടെ ഫോട്ടോ പ്രദർശിപ്പിച്ച് സംഭവം വിശദീകരിച്ചു. എഹ്കിലും കാണികളെ നിരാശരാക്കാതെ പരിപാടി അവതരിപ്പിച്ചാണ് കലാകാരന്മാർ മടങ്ങിയത്.
കണ്ണൂർ ഇരിട്ടി സ്വദേശികളായ കെ നസീർ, പിബി സിറാജുദ്ദീൻ എന്നിവരുടെ നേതൃത്വത്തിൽ സ്വകാര്യ ഇവന്റ് മാനേജുമെന്റാണ് തൃക്കരിപ്പൂരിൽ വേദിയൊരുക്കിയത്.കണ്ണൂർ തായിനേരി സ്വദേശികളായ സുബൈർ സുഹൈബ് എന്നിവർ മുഖാന്തിരം ആണ് ഗാനമേള സംഘത്തിന് സംഘാടകരിൽ നിന്ന് അഡ്വാൻസ് വാങ്ങിയത്.












