കോസ്റ്ററിക്ക: ഇണ ചേരാതെ തന്നെ ഗർഭിണിയായ പെൺമുതല കൗതുകമാകുന്നു. കോസ്റ്ററിക്കയിലെ മൃഗശാലയിലാണ് ശാസ്ത്രലോകത്തെ തന്നെ അത്ഭുതപ്പെടുത്തിയ സംഭവം ഉണ്ടായത്. ആൺ മുതലകളുമായി ഇണ ചേരാതെ പ്രത്യുൽപ്പാദനം നടത്തിയ മുതലയുമായി 99.9 ശതമാനം സാദൃശ്യമുള്ള കുഞ്ഞാണ് പിറന്നത്.
വിർജീനിയ പോളിടെക്‌നിക് ഇൻസ്റ്റിറ്റ്യൂട്ട് , യുഎസിലെ സ്റ്റേറ്റ് യൂണിവേഴ്‌സിറ്റി എന്നിവിടങ്ങളിൽ നിന്നുള്ള ഗവേഷകർ അടങ്ങുന്ന സംഘം വിഷയത്തിൽ പഠനം നടത്തിക്കൊണ്ടിരിക്കുകയാണ്. ഇണ ചേരാതെ തന്നെ കുഞ്ഞുങ്ങളെ ഉത്പാദിപ്പിക്കുന്നതിനു കഴിവുള്ള ജീവികൾ ഉണ്ടെങ്കിലും മുതലയിൽ ഇത്തരമൊരു പ്രതിഭാസം ആദ്യമാണെന്നാണ് ഗവേഷകർ പറയുന്നത്. ഡിഎൻഎ പരിശോധനയിൽ നിന്നാണ് ഇണ ചേരാതെ തന്നെയാണ് കുഞ്ഞ് പിറന്നതെന്നടക്കമുള്ള കണ്ടെത്തലുകൾ ലഭിച്ചത്. ബയോളജി ലെറ്റേഴ്‌സ് എന്ന ജേണലിൽ ഇതു സംബന്ധിച്ച പഠനം പ്രസിദ്ധീകരിച്ചിട്ടുണ്ട്.
ഫാക്കൽറ്റേറ്റീവ് പാർത്തനോജെനസിസ് എന്നാണ് ഇണ ചേരാതെ തന്നെ കുഞ്ഞുങ്ങളെ ഉത്പാദിപ്പിക്കുന്ന പ്രതിഭാസം അറിയപ്പെടുന്നത്. പക്ഷികൾ, ചില പാമ്പുകൾ ഉൾപ്പെടെയുള്ള ഉരഗങ്ങൾ മത്സ്യങ്ങൾ എന്നിവയെല്ലാം ഈ സ്വഭാവം പ്രകടിപ്പിക്കാറുണ്ട്. വംശനാശം നേരിടുന്ന ജീവികളിൽ ഇത്തരം പ്രതിഭാസം സാധാരണയായി കാണപ്പെടാറുണ്ട്
കോസ്റ്റാറിക്കയിലെ മൃഗശാലയിൽ 2 വയസുള്ളപ്പോൾ മുതൽ 16 വർഷങ്ങളായി ഇണ ചേരാൻ അനുവദിക്കാതെ അടച്ചിട്ടിരുന്ന മുതലയാണ് 14 മുട്ടകൾ ഇട്ടത്. ഇതിൽ ഒരു മുട്ടയിൽ നിന്നാണ് പൂർണമായും വളർച്ച പ്രാപിച്ചെങ്കിലും ജീവൻ നഷ്ടപ്പെട്ട കുഞ്ഞിനെ കണ്ടെത്തിയത്.ജനിതകമായി കൈമാറ്റം ചെയ്യപ്പെട്ടതായിരിക്കാം ഈ കഴിവെന്നാണ് ഗവേഷകരുടെ നിഗമനം. അങ്ങനെയെങ്കിൽ ഡൈനോസറുകൾക്കും ഇണ ചേരാതെ കുഞ്ഞുങ്ങൾ ഉണ്ടാകുമായിരുന്നുവെന്ന് കരുതേണ്ടി വരുമെന്നും ഗവേഷകർ പറയുന്നു.
