കാഞ്ഞിരപ്പള്ളി: അമൽജ്യോതി എഞ്ചിനീയറിംഗ് കോളേജിൽ വിദ്യാർത്ഥിനി ശ്രദ്ധ സതീഷ് ജീവനൊടുക്കിയ സംഭവത്തിൽ അന്വേഷണം ആരംഭിച്ച് ജില്ലാ ക്രൈംബ്രാഞ്ച്. ഡിവൈഎസ്പി ടി.എം.വർഗീസിന്റെ നേതൃത്വത്തിലുള്ള അന്വേഷണസംഘം കോളേജിന്റെ ഹോസ്റ്റൽ മുറിയിലും ലാബിലും പരിശോധന നടത്തി. ശ്രദ്ധ സഹപാഠിക്ക് എഴുതിയത് എന്ന് പറയപ്പെടുന്ന കുറിപ്പ് കഴിഞ്ഞ ദിവസം കണ്ടെടുത്തതായി പോലീസ് പറഞ്ഞിരുന്നു. ”നിന്നോട് വാങ്ങിയ പാന്റ്സ് കട്ടിലിൽ വച്ചിട്ടുണ്ട്, ഞാൻ പോവുകയാണ്” എന്ന് മാത്രമാണ് ഈ കുറിപ്പിൽ ഉണ്ടായിരുന്നത്.
എന്നാൽ ശ്രദ്ധ എഴുതിയത് എന്ന് പറയുന്ന ഈ കുറിപ്പ് വ്യാജമാണെന്നാണ് കുടുംബത്തിന്റെ ആരോപണം. സുഹൃത്തുക്കൾക്ക് 2022 ഒക്ടോബറിൽ അയച്ച മെസേജ് സാഹചര്യം മാറ്റി ഉപയോഗിക്കുകയാണെന്നാണ് ആരോപണം. ക്രൈംബ്രാഞ്ചിന്റെ അന്വേഷണത്തിൽ വിശ്വാസമില്ലെന്നും ശ്രദ്ധയുടെ പിതാവ് പി.പി.സതീശൻ പറഞ്ഞു.
അതേസമയം അമൽജ്യോതി എഞ്ചിനീയറിംഗ് കോളേജിന് പോലീസ് സംരക്ഷണം ആവശ്യപ്പെട്ട് മാനേജ്മെന്റ് ഹൈക്കോടതിയെ സമീപിച്ചു. എസ്എഫ്ഐ, കെഎസ്യു, എസ്ഡിപിഐ തുടങ്ങിയ സംഘടനകളുടെ നേതൃത്വത്തിൽ നടക്കുന്ന പ്രതിഷേധസമരം കാരണം കോളേജിന്റെ പ്രവർത്തനം തടസ്സപ്പെട്ടുവെന്ന് ചൂണ്ടിക്കാട്ടി കോളേജ് മാനേജ് മാനേജ്മെന്റും മാനേജർ ഫാ.ഡോ.മാത്യു പൈക്കാട്ടുമാണ് ഹർജി നൽകിയത്. കോളേജിന്റെ പ്രവർത്തനം തടസ്സമില്ലാതെ നടക്കാനും ക്യാംപസിൽ പ്രവേശനം തടയാതിരിക്കാനും മതിയായ പോലീസ് സംരക്ഷണം ആവശ്യപ്പെട്ട് കോട്ടയം ജില്ലാ പോലീസ് മേധാവിക്കും കാഞ്ഞിരപ്പള്ളി സ്റ്റേഷൻ ഹൗസ് ഓഫീസർക്കും നിവേദനം നൽകിയിട്ടും നടപടിയൊന്നും എടുത്തില്ലെന്നും ഹർജിയിൽ ആരോപിക്കുന്നു.












