തിരുവനന്തപുരം: എസ്എഫ്ഐ തിരുവനന്തപുരം ജില്ലാ സമ്മേളനത്തിനിടെ ഉന്തും തളളും. ജില്ലാ പ്രസിഡന്റ് സ്ഥാനത്ത് നിന്നും ആദിത്യനെ മാറ്റിയതുമായി ബന്ധപ്പെട്ടാണ് തർക്കവും ഉന്തും തളളും ഉണ്ടായത്. വഞ്ചിയൂർ ഏരിയയിൽ നിന്നുളള എംഎ നന്ദനാണ് പുതിയ പ്രസിഡന്റ്.
കാട്ടാക്കട ക്രിസ്ത്യൻ കോളജിൽ കൗൺസിലറായി വിജയിച്ച വിദ്യാർത്ഥിനിക്ക് പകരം
എസ്എഫ്ഐ ഏരിയ സെക്രട്ടറി വിശാഖിന്റെ പേര് ഉൾപ്പെടുത്തി സർവ്വകലാശാലയ്ക്ക് അയച്ച വിവാദത്തിൽ ആരോപണ വിധേയനായിരുന്നു ആദിത്യൻ. ജില്ലാ സമ്മേളന പ്രതിനിധികളിൽ നിന്ന് ഈ സംഭവത്തിൽ വലിയ വിമർശനം ഉയർന്നിരുന്നു.
ലഹരി ഉപയോഗ വിവാദത്തിൽ പെട്ട് നീക്കിയ ജില്ലാ സെക്രട്ടറി ഗോകുലിനും പ്രസിഡന്റ് ജോബിൻ ജോസിനും പകരക്കാരായിട്ടാണ് 2022 ഡിസംബർ 30 ന് ആദിത്യനെയും സെക്രട്ടറിയായി എസ്കെ ആദർശിനെയും തിരഞ്ഞെടുത്തത്. എന്നാൽ ഈ ജില്ലാ സമ്മേളനത്തിൽ ആദർശിനെ നിലനിർത്തി ആദിത്യനെ മാത്രം മാറ്റുകയായിരുന്നു. ഇതാണ് പ്രതിനിധികളിൽ ചിലരെ പ്രകോപിപ്പിച്ചത്.












