കണ്ണൂർ: കണ്ണൂരിൽ തെരുവുനായകളുടെ കടിയേറ്റ് ദാരുണമായി കൊല്ലപ്പെട്ട പതിനൊന്നുകാരൻ നിഹാൽ നൗഷാദിന്റെ ഇൻക്വസ്റ്റ് റിപ്പോർട്ട് പുറത്ത്. തല മുതൽ കാൽപ്പാദം വരെ നിരവധി മുറിവുകളുണ്ടെന്നാണ് ഇൻക്വസ്റ്റ് റിപ്പോർട്ടിൽ പറയുന്നത്. കഴുത്തിന് പുറകിലും ചെവിക്ക് പുറകിലും ഇടത് കണ്ണിന് താഴെയും മുറിവുകളുണ്ട്. പൊക്കിളിന് താഴെ മുതൽ കാൽമുട്ട് വരെ നായ കടിച്ചു പറിച്ച നിലയിലാണ് ഉള്ളത്.
ഇന്നലെ വൈകിട്ട് അഞ്ചു മണിയോടെ കാണാതായ കുട്ടിയെ ആളെഴിഞ്ഞ പുരയിടത്തിൽ നിന്ന് നായ്ക്കൾ കടിച്ചുകീറിയ നിലയിലാണ് കണ്ടെത്തിയത്. അരയ്ക്ക് താഴെ മാംസം മുഴുവൻ നായ്ക്കൾ കടിച്ചെടുത്ത നിലയിലായിരുന്നു കുട്ടിയെ കണ്ടെത്തിയത്. ഉടൻ തന്നെ തലശ്ശേരി ജനറൽ ആശുപത്രിയിലെത്തിച്ചെങ്കിലും മരണം സ്ഥിരീകരിച്ചു. സംസാരശേഷിയില്ലാത്ത കുട്ടിയായതിനാൽ നായ്ക്കൾ ആക്രമിച്ചപ്പോൾ നിലവിളിക്കാൻ പോലും സാധിക്കാത്ത അവസ്ഥയിലായിരുന്നു കുട്ടി. വിദേശത്തുള്ള നിഹാലിന്റെ പിതാവ് നൗഷാദ് മകന്റെ മരണവിവരമറിഞ്ഞ് നാട്ടിലേക്ക് തിരിച്ചിട്ടുണ്ട്.
പ്രദേശത്ത് നായശല്ല്യം രൂക്ഷമാണെന്നാണ് നാട്ടുകാരടക്കം പരാതി പറയുന്നത്. പ്രതിഷേധം ശക്തമായതോടെ ജില്ലാ പഞ്ചായത്ത് നായ്ക്കളെ പിടികൂടാനാരംഭിച്ചു. തെരുവ് നായ കുട്ടിയെ കടിച്ചു കൊന്ന സംഭവത്തിൽ ഹൈക്കോടതി ഇടപെടണമെന്ന് കണ്ണൂർ ജില്ലാ പഞ്ചായത്ത് പ്രസിഡണ്ട് പി പി ദിവ്യ ആവശ്യപ്പെട്ടു. ജനങ്ങളുടെ ജീവനാണ് വില നൽകേണ്ടത്. അക്രമകാരികളായ തെരുവ് നായകളെ കൊല്ലാൻ അനുമതി വേണം. ഇതിനായി സുപ്രീം കോടതിയെ സമീപിക്കുമെന്നും ഇവർ പറഞ്ഞു.












