കോഴിക്കോട് : മലബാർ ദശാവതാര ക്ഷേത്രങ്ങൾ കൊണ്ട് കൂടി കേരള ഭൂപടത്തിൽ പ്രത്യേക സ്ഥാനം നേടുന്നുണ്ട്. കോഴിക്കോട് ജില്ലയിലാണ് ദശാവതാര ക്ഷേത്രങ്ങൾ സ്ഥിതിചെയ്യുന്നത്. ഈ ക്ഷേത്രങ്ങൾ എല്ലാം തന്നെ 6 കിലോമീറ്ററിനുള്ളിൽ സ്ഥിതി ചെയ്യുന്നവയാണ്. ഭക്തർക്ക് ഇവിടെ രാവിലെ എത്തിയാൽ ഭഗവാൻ വിഷ്ണുവിന്റെ കൽക്കി ഒഴികെയുള്ള 9 അവതാരങ്ങളെയും കണ്ട് തൊഴുതു മടങ്ങാൻ കഴിയുന്നതാണ്.
കോഴിക്കോട് ജില്ലയിലെ കാക്കൂർ നന്മണ്ട ചേളന്നൂർ പഞ്ചായത്തുകളിലായിട്ടാണ് ദശാവതാര ക്ഷേത്രങ്ങൾ സ്ഥിതിചെയ്യുന്നത്. പെരുമീൻപുറം മത്സ്യാവതാര ക്ഷേത്രം , ആമമംഗലം കൂർമ്മാവതാര ക്ഷേത്രം , തൃക്കോയിൽ നരസിംഹാവതാര ക്ഷേത്രം , രാമല്ലൂർ ശ്രീരാമസ്വാമി ക്ഷേത്രം , കാവിൽ ബലരാമസ്വാമി ക്ഷേത്രം , തീർത്ഥങ്കര വാമന ക്ഷേത്രം , ഈന്താട് ശ്രീകൃഷ്ണ ക്ഷേത്രം എന്നിവയാണ് കാക്കൂർ പഞ്ചായത്തിൽ സ്ഥിതി ചെയ്യുന്ന ക്ഷേത്രങ്ങൾ. ഇതോടൊപ്പം നന്മണ്ട പഞ്ചായത്തിലെ വരാഹ ക്ഷേത്രം, ചേളന്നൂർ പഞ്ചായത്തിലെ പരശുരാമ ക്ഷേത്രം എന്നിവ കൂടി ചേർന്നതാണ് ദശാവതാര ക്ഷേത്രങ്ങൾ. പുരാതന കാലത്ത് കൽക്കി അവതാരത്തിന്റെ ഒരു ക്ഷേത്രം കൂടി ഈ മേഖലയിൽ ഉണ്ടായിരുന്നതായി പറയപ്പെടുന്നുണ്ട്. എന്നാൽ പിന്നീടത് മണ്ണ്മൂടി പോയെന്നാണ് പറയപ്പെടുന്നത്. വറ്റാത്ത നീരുറവകൾ കൊണ്ട് ജലസമൃദ്ധമായ പൊൻകുന്ന് മലയുടെ താഴ്വരയിലാണ് ഈ ക്ഷേത്രങ്ങളെല്ലാം സ്ഥിതിചെയ്യുന്നത്.
എല്ലാ കർക്കിടക മാസത്തിലും നടത്തുന്ന നാലമ്പല തീർത്ഥയാത്ര പോലെ ഈ വർഷം മുതൽ വൃശ്ചിക മാസങ്ങളിൽ ഒരു ദശാവതാര ക്ഷേത്ര തീർത്ഥയാത്ര ആരംഭിക്കാനുള്ള പദ്ധതിയിലാണ് മലബാറിലെ ദശാവതാരക്ഷേത്ര ഏകോപന സമിതി. ഒരു തീർത്ഥാടന ടൂറിസം പദ്ധതിയായാണ് ഇത് ഒരുക്കുന്നത്. കോഴിക്കോടിന്റെ വിനോദസഞ്ചാര മേഖലയിൽ മറ്റൊരു കാൽവെയ്പ്പാകും ഈ തീർത്ഥാടന ടൂറിസം എന്ന് കരുതപ്പെടുന്നു. ഈ പദ്ധതിയുടെ സോഷ്യൽ മീഡിയ ലോഞ്ചിംഗ് ടൂറിസം മന്ത്രി പി എ മുഹമ്മദ് റിയാസ് നിർവഹിച്ചു. ക്ഷേത്രദർശനത്തിനെത്തുന്ന തീർത്ഥാടകർക്ക് താമസ സൗകര്യം , ജീപ്പ് യാത്രാ സൗകര്യം , എന്നിവ ഏകോപന സമിതിയുടെ മേൽനോട്ടത്തിൽ ഒരുക്കി നൽകുന്നതാണ്. ദശാവതാര ക്ഷേത്രങ്ങളെക്കുറിച്ചുള്ള ബ്രോഷർ പ്രകാശനവും ഈ ചടങ്ങിൽ ടൂറിസം മന്ത്രി പി എ മുഹമ്മദ് റിയാസ് അവതരിപ്പിച്ചു.











