പ്രശസ്ത നടനും സംവിധായകനുമായ ആർ മാധവൻ പങ്കുവെച്ച ചില ചിത്രങ്ങളാണ് ഇപ്പോൾ സമൂഹമാധ്യമങ്ങളിൽ ഏവരുടെയും ശ്രദ്ധ നേടുന്നത്. പാരീസിലെ ലൂവ്രെ മ്യൂസിയത്തിൽ പ്രധാനമന്ത്രി നരേന്ദ്ര മോദിക്കായി ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഒരുക്കിയ വിരുന്നിന്റെ ചിത്രങ്ങളാണിത്. മാധവനും ഈ വിരുന്നിൽ പങ്കെടുത്തിരുന്നു.
“ഈ അത്താഴ വിരുന്നിൽ ഞാൻ പൂർണ വിസ്മയത്തിലായിരുന്നു. നമ്മുടെ ബഹുമാനപ്പെട്ട പ്രധാനമന്ത്രി ശ്രീ നരേന്ദ്ര മോദിയുടെ ബഹുമാനാർത്ഥം പ്രസിഡന്റ് ഇമ്മാനുവൽ മാക്രോൺ ഈ വിശിഷ്ട വിരുന്നിന് ആതിഥേയത്വം വഹിച്ചു. ഈ രണ്ട് മഹത്തായ സൗഹൃദ രാഷ്ട്രങ്ങളുടെ ഭാവിയെക്കുറിച്ചുള്ള അവരുടെ കാഴ്ചപ്പാട് അവർ ആവേശത്തോടെ വിവരിച്ചു ,” എന്നിങ്ങനെയുള്ള നീണ്ട ഒരു കുറിപ്പോടെയാണ് മാധവൻ തന്റെ ഇൻസ്റ്റാഗ്രാം സ്റ്റോറി പങ്കുവെച്ചിരിക്കുന്നത്.
“ ഈ അന്തരീക്ഷത്തിലെ പോസിറ്റിവിറ്റിയും പരസ്പര ബഹുമാനവും സ്നേഹത്തോടെയുള്ള ആലിംഗനം പോലെയായിരുന്നു. അവരുടെ ചിന്തകളും സ്വപ്നങ്ങളും നമുക്കെല്ലാവർക്കും ആവശ്യമുള്ളതും ഉചിതമായതുമായ സമയത്ത് ഫലം കായ്ക്കുന്നതുമാകട്ടെ എന്ന് ആത്മാർത്ഥമായി പ്രാർത്ഥിക്കുന്നു. പ്രസിഡന്റ് മാക്രോൺ ഞങ്ങൾക്കായി ഒരു സെൽഫി എടുത്തു. നമ്മുടെ ബഹുമാനപ്പെട്ട പ്രധാനമന്ത്രി വളരെ സ്നേഹത്തോടെ അതിന്റെ ഭാഗമാകാൻ എഴുന്നേറ്റു നിന്നു.. ആ ചിത്രത്തിന്റെ പ്രത്യേകതയും സ്വാധീനവും ഒരുപോലെ എന്റെ മനസ്സിൽ എന്നും മായാതെ നിൽക്കും,” എന്നും മാധവൻ തന്റെ ഇൻസ്റ്റാഗ്രാം സ്റ്റോറിയിൽ കുറിച്ചു.
ജൂലൈ 14 നാണ് പ്രധാനമന്ത്രി മോദിക്കായി പാരീസിലെ ലൂവ്രെ മ്യൂസിയത്തിൽ ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഒരു പ്രത്യേക വിരുന്ന് സംഘടിപ്പിച്ചത് . 1957-ന് ശേഷം ഇതാദ്യമായാണ് ലൂവ്രെ മ്യൂസിയത്തിൽ ഒരു മഹത്തായ വിരുന്ന് സംഘടിപ്പിക്കുന്നത്. 1957-ൽ ലൂവ്രെ മ്യൂസിയത്തിൽ നടന്ന അവസാനത്തെ വിരുന്നിലെ അതിഥി എലിസബത്ത് രാജ്ഞി രണ്ടാമൻ ആയിരുന്നു . പ്രധാനമന്ത്രി നരേന്ദ്രമോദിക്കായി സംഘടിപ്പിച്ച വിരുന്നിൽ ഗ്രാമി അവാർഡ് ജേതാവായ സംഗീതജ്ഞൻ റിക്കി കേജും പങ്കെടുത്തിരുന്നു. പ്രധാനമന്ത്രി മോദിക്കും ഫ്രാൻസിന്റെ മാക്രോണിനുമൊപ്പം ഇരിക്കാനും അവരോടൊപ്പം അത്താഴം കഴിക്കാനും കഴിഞ്ഞത് വലിയ ബഹുമതിയാണെന്ന് പിന്നീട് റിക്കി കേജ് ട്വീറ്റ് ചെയ്തിരുന്നു.
