മലപ്പുറം: വിടവാങ്ങിയ മുൻ മുഖ്യമന്ത്രി ഉമ്മൻചാണ്ടിയെ അപമാനിക്കുന്ന രീതിയിൽ വാട്സ്ആപ്പ് സന്ദേശം അയച്ച ബാങ്ക് മാനേജർക്കെതിരെ പരാതി. യൂത്ത് കോൺഗ്രസാണ് പരാതിപ്പെട്ടത്. മലപ്പുറം എസ് ബി ഐ റീജണൽ മാനേജർ മിനിമോൾ ആണ് ബാങ്കിന്റെ ഒഫീഷ്യൽ വാട്സ് ആപ്പ് ഗ്രൂപ്പിൽ ഉമ്മൻ ചാണ്ടിയെ അവഹേളിക്കുന്ന തരത്തിൽ സന്ദേശം അയച്ചതെന്ന് പരാതയിൽ പറയുന്നു.
ഔദ്യോഗിക അവധി പ്രഖ്യാപിച്ച ഇന്ന് എല്ലാ ജീവനക്കാരും ജോലിക്ക് ഹാജരാവണമെന്നും റീജണൽ മാനേജർ ആവശ്യപ്പെട്ടെന്നും പരാതിയിൽ പറയുന്നു. സംഭവത്തെ തുടർന്ന് യൂത്ത് കോൺഗ്രസ് സംസ്ഥാന ജനറൽ സെക്രട്ടറി പി കെ നൗഫൽ ബാബു മലപ്പുറം ജില്ലാ പോലീസ് മേധാവിക്ക് പരാതി നൽകിയിട്ടുണ്ട്.
‘പൊതുദർശനം ബാംഗ്ലൂർ ആണ്. സൗകര്യമുള്ളവർക്ക് അങ്ങോട്ടും പോയി ആദരാജ്ഞലി അർപ്പിക്കാം’ എന്നാണ് മാനേജർ ഗ്രൂപ്പിൽ പറഞ്ഞത്. റീജണൽ മാനേജറിന്റെ പെരുമാറ്റം ബഹുമാന്യനായ നേതാവിന്റെ വിയോഗത്തിൽ ദുഖിച്ചിരിക്കുന്ന കേരള സമൂഹത്തെയാകെ അപമാനിക്കുന്നതിന് തുല്യമാണ്. കൂടാതെ, സർക്കാർ നയങ്ങളെ പൊതുയിടങ്ങളിൽ അവഹേളിക്കുക വഴി ഉദ്യോഗസ്ഥ സർവ്വീസ് ചടങ്ങളുടെ ലംഘനം കൂടിയാണ് നടത്തിയിരിക്കുന്നതെന്നും കർശന നടപടികൾ സ്വീകരിക്കണമെന്നും യൂത്ത് കോൺഗ്രസ് ആവശ്യപ്പെട്ടു.












