മൂന്നുമാസത്തോളം നീണ്ടുനിൽക്കുന്ന കടുത്ത വേനലിനും ചൂടിനും ശേഷം പെട്ടെന്ന് വരുന്ന മഴക്കാലവും തണുപ്പും ശരീരത്തിന്റെ സന്തുലനാവസ്ഥയ്ക്ക് ഭംഗം വരുത്തുന്നതാണ്. പ്രത്യേകിച്ചും കർക്കിടകം പെരുമഴ നീണ്ടു നിൽക്കുന്ന സമയമാണ്. ശരീരത്തിൽ വാത, പിത്തരസങ്ങൾ അടിഞ്ഞുകൂടുന്ന കാലം. ഈ സമയത്ത് നമ്മുടെ ശരീരത്തിന്റെ സന്തുലനാവസ്ഥ നിലനിർത്താനും ദഹനശക്തി വർധിപ്പിക്കാനും രോഗപ്രതിരോധത്തിനും എല്ലാമായി പരമ്പരാഗത കാലം മുതലേ മലയാളികൾ തുടർന്നു വന്നിരുന്ന ഒരു ശീലമായിരുന്നു കർക്കിടകത്തിലെ ഔഷധക്കഞ്ഞി അഥവാ കർക്കിടകകഞ്ഞി. പണ്ടുകാലങ്ങളിൽ ഈ കഞ്ഞിക്കായുള്ള ഔഷധക്കൂട്ടുകൾ വേനൽക്കാലങ്ങളിൽ തന്നെ ആളുകൾ ശേഖരിച്ചു വയ്ക്കുമായിരുന്നു. ഉണക്കിയും പൊടിച്ചും ഒക്കെ സൂക്ഷിച്ചുവയ്ക്കുന്ന പച്ചമരുന്നുകൾ നല്ല കുത്തരിയിൽ ഇട്ട് തിളപ്പിച്ച് കുടിച്ചിരുന്ന ആ ഔഷധക്കഞ്ഞി ശരീരത്തെ ആരോഗ്യകരമായി നിലനിർത്താനും മികച്ച ദഹനത്തിനും സഹായിക്കുന്നതായിരുന്നു.
തുടർച്ചയായി പെയ്യുന്ന മഴ ധാരാളം അസുഖങ്ങൾ സമ്മാനിക്കുന്ന ഈ കർക്കിടക കാലത്ത് ദേഹരക്ഷയ്ക്കും രോഗപ്രതിരോധശേഷിയ്ക്കുമായി സ്വയം വീട്ടിൽ തന്നെ ചെയ്യാവുന്ന ഏറ്റവും മികച്ച ചികിത്സയാണ് ഔഷധക്കഞ്ഞി. നവര, ഞവര ഇങ്ങനെയുള്ള പേരുകളിൽ അറിയപ്പെടുന്ന പ്രത്യേക അരിയാണ് ഔഷധക്കഞ്ഞി തയ്യാറാക്കാനായി ഉപയോഗിക്കാറുള്ളത്. ഈ അരിയോടൊപ്പം നിരവധി ഔഷധങ്ങളും സുഗന്ധവ്യഞ്ജനങ്ങളും അടങ്ങിയ ഒരു കൂട്ടും ചേർക്കുന്നതാണ് . കുറുന്തോട്ടി വേരാണ് ഔഷധക്കഞ്ഞിയിലെ ഒരു പ്രധാന ചേരുവ. ഒപ്പം ചെറൂള, കീഴാർനെല്ലി, തഴുതാമ, തുളസി, നിലംപരണ്ട, പൂവാംകുറുന്നില, മുയൽച്ചെവിയൻ, തകര,മുക്കുറ്റിവേര്, ഉഴിഞ്ഞ, തൊട്ടാവാടിവേര്, ചെറുകടലാടി… എന്നിങ്ങനെ ഔഷധങ്ങളുടെ ഒരു നീണ്ട നിര തന്നെയുണ്ട് കൂടെ. സുഗന്ധവ്യഞ്ജനങ്ങളായി ചുക്ക്,ജീരകം,കുരുമുളക്, ഉലുവ എന്നിങ്ങനെയുള്ളവ വേറെയും.
പണ്ടുകാലങ്ങളിൽ ഈ ഔഷധങ്ങളും സുഗന്ധവ്യഞ്ജനങ്ങളും എല്ലാം വീട്ടിൽ തന്നെയായിരുന്നു അരച്ചും പൊടിച്ചും തയ്യാറാക്കിയിരുന്നത്. എന്നാൽ ഇപ്പോൾ കർക്കിടക കഞ്ഞി കൂട്ട് അല്ലെങ്കിൽ ഔഷധ കഞ്ഞി കൂട്ട് എന്ന പേരിൽ ഇത് പച്ചമരുന്ന് കടകളിലും ആയുർവേദ കടകളിലും എല്ലാം ലഭ്യമാണ്. കർക്കിടക കഞ്ഞി കുറഞ്ഞത് ഏഴ് ദിവസമെങ്കിലും തുടർച്ചയായി കഴിക്കണം എന്നാണ് പറയപ്പെടുന്നത്. രാത്രിയോ രാവിലെയോ ഇത് കഴിക്കാവുന്നതാണ്. ശരീരത്തിന് രോഗപ്രതിരോധശേഷി നൽകുന്നതോടൊപ്പം ദഹനം മെച്ചപ്പെടുത്തുകയും വാതസംബന്ധമായ അസുഖങ്ങൾ, പ്രമേഹം, ഹൃദ്രോഗം, ഉദരരോഗങ്ങൾ എന്നിവയ്ക്ക് ശമനം നൽകുകയും ചെയ്യാൻ കർക്കിടകകഞ്ഞിക്ക് കഴിയുമെന്നാണ് പറയപ്പെടുന്നത്.
