കാസർകോട്: ഫാഷൻ ഗോൾഡ് തട്ടിപ്പ് കേസിൽ സമർപ്പിച്ച സത്യവാങ്മൂലത്തിലെ ഒപ്പ് തന്റേതല്ലെന്ന് മുൻ ജില്ലാ പബ്ലിക് പ്രോസിക്യൂട്ടർ സി. ഷുക്കൂർ. തന്നെ മനപ്പൂർവ്വം കരിവാരിത്തേക്കാനുള്ള ശ്രമമാണ് നടക്കുന്നത്. അന്വേഷണം വഴി തെറ്റിക്കാനുളള ഗൂഢ നീക്കമാണ് നടക്കുന്നത് എന്നും ഷുക്കൂർ പ്രതികരിച്ചു.
മജിസ്ട്രേറ്റ് കോടതിയെ സമീപിച്ച തട്ടിപ്പ് കേസിലെ 11ാം പ്രതി എസ്.കെ മുഹമ്മദ് കുഞ്ഞിയെ കണ്ടതായി ഓർക്കുന്നില്ല. അദ്ദേഹം സമർപ്പിച്ച സത്യവാങ്മൂലത്തിലെ ഒപ്പ് തന്റേതുമല്ല. കേസിന്റെ പേരിൽ തന്നെ സമൂഹമാദ്ധ്യമങ്ങളിൽ കരിവാരി തേയ്ക്കുന്നു. സംഭവത്തിന് പിന്നിൽ ഗൂഢാലോചനയുണ്ടെന്നും ഷുക്കൂർ വ്യക്തമാക്കി.
നോട്ടറി രജിസ്റ്റർ സൂക്ഷിക്കുന്നതിന് നിശ്ചിത കാലാവധിയുണ്ട്. 2013 ലെ രേഖയെക്കുറിച്ച് തനിക്ക് അറിയില്ല. വ്യാജ രേഖ ചമച്ചത് ആരാണെന്ന് കണ്ടെത്തേണ്ടതുണ്ട്. നിക്ഷേപതട്ടിപ്പുമായി ബന്ധപ്പെട്ട് ജനങ്ങളുടെ ശ്രദ്ധ മാറ്റാനുള്ള ശ്രമമാണ് നടക്കുന്നത് എന്നും ഷുക്കൂർ അറിയിച്ചു.
വ്യാജ രേഖ ചമച്ച സംഭവത്തിൽ ഷുക്കൂർ ഉൾപ്പെടെ നാല് പ്രതികൾക്കെതിരെ കേസ് എടുക്കാൻ ഹൊസ്ദുർഗ് കോടതി ഉത്തരവിട്ടിരുന്നു. ഇതിന് പിന്നാലെയായിരുന്നു പ്രതികരണവുമായി രംഗത്ത് എത്തിയിരിക്കുന്നത്. മുഹമ്മദ് കുഞ്ഞിയുടെ പരാതിയിലാണ് നടപടി.












