ജോലിയൊന്നും ചെയ്യാതെ ദിവസം മുഴുവന്‍ ചീട്ടുകളിച്ചിരുന്നോ എന്ന് മാതാപിതാക്കള്‍ മക്കളെ വഴക്കുപറഞ്ഞിരുന്ന ഒരു കാലമുണ്ടായിരുന്നു. പക്ഷേ കാലം മറിയില്ലേ, കഥയും മാറി. ഇപ്പോള്‍ ചീട്ടുകളിയും ഒരു വരുമാനമാര്‍ഗ്ഗമാണ്. ഓണ്‍ലൈന്‍ ഗെയിമുകള്‍ അരങ്ങുവാഴുന്ന കാലത്ത് ഏറ്റവും നല്ല ചീട്ടുകളിക്കാരെ ജോലിക്കെടുക്കാനൊരുങ്ങുകയാണ് പ്രമുഖ കളിപ്പാട്ട നിര്‍മ്മാണ, വിനോദ കമ്പനിയായ മട്ടേല്‍. ചീഫ് യുനോ ഓഫീസര്‍ക്ക് വേണ്ടിയുള്ള അപേക്ഷ ക്ഷണിച്ചുകൊണ്ടുള്ള കമ്പനി പരസ്യം ചര്‍ച്ചയാകുകയാണ്.
മട്ടേല്‍ കമ്പനി പുറത്തിറക്കിയ യുനോ കാര്‍ഡ് ഗെയിമിന്റെ ഏറ്റവും പുതിയ കാര്‍ഡ് ഗെയിം ആയ യുനോ ക്വാട്രോ, യുനോ ആരാധകര്‍ക്ക് മുമ്പില്‍ അവതരിപ്പിക്കുകയാണ് ചീഫ് യുനോ ഓഫീസറുടെ ജോലി. ദിവസം മുഴുവന്‍ ചീട്ടുകളിക്കാം എന്നതുമാത്രമല്ല ഈ ജോലിയുടെ മുഖ്യ ആകര്‍ഷണം. പ്രതിവാരം 4,444 ഡോളര്‍ ആണ് ഈ ജോലിക്ക് കമ്പനി വാഗ്ദാനം ശമ്പളം. അതായത് ഏതാണ്ട് 3.6 ലക്ഷം രൂപ. ആഴ്ചയില്‍ നാല് ദിവസം മാത്രമേ ജോലിയുള്ളു. ഇങ്ങനെ നാലാഴ്ചയാണ് ജോലി ചെയ്യേണ്ടത്.
നിയമനം സംബന്ധിച്ച് മട്ടേല്‍ കമ്പനി പുറത്തിറക്കിയ പത്രക്കുറിപ്പില്‍ ഒരു ദിവസം നാലുമണിക്കൂര്‍ യുനോ ക്വാട്രോ കളിക്കുക എന്ന ഉത്തരവാദിത്തമായിരിക്കും ചീഫ് യുനോ ഓഫീസര്‍ക്ക് ഉണ്ടായിരിക്കുക എന്നാണ് പറയുന്നത്. അപരിചിതരെ യുനോ കളിക്കാന്‍ ക്ഷണിക്കുക എന്ന ഉത്തരവാദിത്തമുള്ളതുകൊണ്ട് ഹൃദ്യമായ പെരുമാറ്റവും ഊര്‍ജ്ജസ്വലതയും യുനോ ബ്രാന്‍ഡിനോട് ഇഷ്ടവും ഉള്ളവരായിരിക്കണം ഉദ്യോഗാര്‍ത്ഥികള്‍. ന്യൂയോര്‍ക്ക് സിറ്റിയിലാണ് തൊഴിലവസരം.
ഉച്ചനേരങ്ങളില്‍ യുനോ കളിച്ചിരിക്കാന്‍ ആര്‍ക്കാണ് ഇഷ്ടമില്ലാത്തതെന്നും അതിന് ശമ്പളം കൂടി ലഭിച്ചാല്‍ അതില്‍പ്പരമെന്തുവേണമെന്നും മട്ടേല്‍ വൈസ് പ്രസിഡന്റും ഗെയിംസ് വിഭാസം ആഗോള മേധാവിയുമായ റേ അഡ്‌ലര്‍ പുതിയ തൊഴിലവസര പരസ്യത്തെ കുറിച്ച് പ്രതികരിച്ചു. ആഗസ്റ്റ് 10 വരെയാണ് കമ്പനി ഈ ജോലിക്കായി അപേക്ഷകള്‍ സ്വീകരിക്കുന്നത്.
