ഭക്ഷണം കഴിക്കുന്നതിനിടെ നാവ് കടിച്ച് പോകുന്നത് നമുക്കെല്ലാവർക്കും സംഭവിക്കാവുന്ന ഒരു കാര്യമാണ്. അൽപ്പസമയത്തെ നീറ്റലിനും വേദനയ്ക്കും ശേഷം കാര്യങ്ങൾ പൂർവ്വസ്ഥിതിയിലാവും. എന്നാൽ അബദ്ധത്തിൽ നാവ് കടിച്ചുപോയ 27 കാരിയായ യുവതി കോമയിലായിപോയി. ഇവിടെയല്ല അങ്ങ് ദൂരെ ഓസ്‌ട്രേലിയയിൽ. അത്താഴം കഴിക്കുന്നതിനിടെ ഓസ്ട്രേലിയയിലെ ഗോൾഡ് കോസ്റ്റ് സ്വദേശിയായ കെയ്റ്റ്ലിൻ ആൽസോപ് എന്ന യുവതി അബദ്ധത്തിൽ നാവ് കടിച്ചുപോയി. സാധാരണ സംഭവമെന്നോർത്ത് യുവതി അതിനെ ഗൗരവമായി എടുത്തില്ല.പക്ഷേ അൽപസമയത്തിനു ശേഷം കെയ്റ്റ്ലിന് ശ്വസിക്കാനും സംസാരിക്കാനും ബുദ്ധിമുട്ട് അനുഭവപ്പെട്ടു. തുടർന്ന് ഡോക്ടറെ കണ്ട് പരിശോധന നടത്തുകയും ചെയ്തു. അനാഫൈലക്‌സിസ് എന്നറിയപ്പെടുന്ന ഒരു അലർജിയാണെന്ന് പറഞ്ഞ്് ഡോക്ടർ അതിനുള്ള മരുന്നുകളും നൽകി.
എന്നാൽ യുവതിയുടെ ചർമം ചുവപ്പും നീലയും നിറത്തിലായി. ചർമം പൊളിഞ്ഞു വരാൻ തുടങ്ങി. നാവ് കുഴഞ്ഞു. വിദഗ്ധ പരിശോധനകൾക്ക് ശേഷം, കെയ്റ്റ്‌ലിനെ ലുഡ്വിഗ്‌സ് ആൻജീന എന്നറിയപ്പെടുന്ന അപൂർവവും ജീവൻ അപകടപ്പെടുത്തുന്നതുമായ അണുബാധ ബാധിച്ചതായി ഡോക്ടർമാർ കണ്ടെത്തി. അണുബാധ വായ്ക്കുള്ളിലും വ്യാപിച്ചിരുന്നു. ഇത് മറ്റ് അവയവങ്ങളെയും ബാധിക്കുന്ന നിലയിലെത്തി.
തുടർന്ന് വിദഗ്ധ ചികിത്സയ്ക്കായി യുവതിയെ കോമ സ്‌റ്റേജിലാക്കുകയായിരുന്നു ഡോക്ടർമാർ. അണുബാധ പൂർണമായും മാറിയതോടെ 27 കാരി ജീവിതത്തിലേക്ക് തിരിച്ചെത്തി. ഇതിന് ഡോക്ടർമാരോടും നേഴ്‌സുമാരോടും മുഴുവൻ മെഡിക്കൽ ടീമിനോടും കെയ്റ്റ്ലിൻ നന്ദി അറിയിച്ചു
