എക്സിൽ (X) പുതിയൊരു വിവാദത്തിന് തിരി കൊളുത്തി ലോകസമ്പന്നനും ടെസ്‌ല, സ്‌പേസ് എക്സ് സിഇഒയുമായ ഇലോൺ മസ്ക്. ഇത്തവണ ആർട്ടിഫിഷ്യൽ ഇന്റലിജൻസോ രാഷ്ട്രീയമോ ബഹിരാകാശ പര്യവേക്ഷണങ്ങളോ ഒന്നുമല്ല മസ്കിന്റെ വിഷയം. ഇംഗ്ലീഷ് ഭാഷയിലെ വ്യാകരണ നിയമങ്ങളിൽ മാറ്റം വരുത്തണമെന്നും വിരാമചിഹ്നങ്ങൾ കൂടുതൽ ലളിതമായി വായിക്കാവുന്ന രീതിയിലാക്കണമെന്നുമാണ് മസ്കിന്റെ പുതിയ വാദം.
യൂൻ-ട തായ് എന്ന എക്സ് ഉപയോക്താവിന്റെ പോസ്റ്റിന് മറുപടിയായാണ് എം ഡാഷുകളുടെ (Em Dash —) ഉപയോഗത്തിൽ മാറ്റം വരുത്തണമെന്ന് മസ്ക് ആവശ്യപ്പെട്ടത്. സയൻസ് ഫിക്ഷൻ നോവലിസ്റ്റ് ഇയാൻ എം ബാങ്ക്സിന്റെ പുസ്തകങ്ങളെക്കുറിച്ചുള്ള കുറിപ്പിലായിരുന്നു മസ്കിന്റെ ഇടപെടൽ. എം ഡാഷുകൾക്ക് ചുറ്റും സ്പേസുകൾ നൽകണമെന്നും, നീളം കൂടിയ എം ഡാഷിനേക്കാൾ എൻ ഡാഷ് (–) ഉപയോഗിക്കുന്നതാണ് വായന കൂടുതൽ എളുപ്പമാക്കുകയെന്നും മസ്ക് വ്യക്തമാക്കുന്നു. ഒരു വാചകത്തിൽ ആശയങ്ങൾ വേർതിരിക്കാനോ ഊന്നൽ നൽകാനോ എം ഡാഷും (—), കണക്കുകളോ സമയപരിധിയോ സൂചിപ്പിക്കാൻ എൻ ഡാഷുമാണ് (–) സാധാരണയായി ഉപയോഗിക്കാറുള്ളത്.
എന്നാൽ, അമേരിക്കൻ മിഡ്‌ടേം തിരഞ്ഞെടുപ്പിൽ റിപ്പബ്ലിക്കൻ പാർട്ടി നേരിട്ട വൻ തോൽവിക്ക് പിന്നാലെ, പാർട്ടിക്ക് വോട്ട് ചെയ്യാൻ ആഹ്വാനം ചെയ്ത് പങ്കുവെച്ച സ്വന്തം എക്സ് പോസ്റ്റുകൾ മസ്ക് നിശബ്ദമായി നീക്കം ചെയ്തതും ഇതിനോടൊപ്പം വലിയ ചർച്ചയായിട്ടുണ്ട്. ടെക്സസ് സെനറ്റ് തിരഞ്ഞെടുപ്പിൽ മസ്കിന്റെ പിന്തുണയുണ്ടായിരുന്ന റിപ്പബ്ലിക്കൻ നേതാവ് കെൻ പാക്സ്റ്റൺ പരാജയപ്പെട്ടതിന് പിന്നാലെയാണ് പോസ്റ്റുകൾ പിൻവലിക്കപ്പെട്ടത്. തോൽവിക്ക് പിന്നാലെ പഴയ പോസ്റ്റുകൾ നീക്കം ചെയ്തത് മസ്കിന്റെ നിർമ്മിത ബുദ്ധി ചാറ്റ്ബോട്ടായ ‘ഗ്രോക്’ (Grok) തന്നെ ശരിവെക്കുകയും ചെയ്തു. രാഷ്ട്രീയ തിരിച്ചടികളിൽ നിന്നും ശ്രദ്ധതിരിക്കാനാണോ മസ്ക് ഇപ്പോൾ ഇംഗ്ലീഷ് വ്യാകരണ പാഠങ്ങളുമായി രംഗത്തെത്തിയിരിക്കുന്നത് എന്നാണ് സോഷ്യൽ മീഡിയയിലെ പുതിയ ചോദ്യം.
