പത്തനംതിട്ട: കോൺഗ്രസ് നേതാവ് രമേശ് ചെന്നിത്തലയെ എൻഎസ് എസ് ആസ്ഥാനത്തേക്ക് ക്ഷണിച്ചതിൽ തെറ്റൊന്നുമില്ലെന്ന് എൻഎസ്എസ് ജനറൽ സെക്രട്ടറി ജി സുകുമാരൻ നായർ.രമേശ് ചെന്നിത്തല മുഖ്യമന്ത്രിയാകാൻ യോഗ്യനാണ്. മറ്റു പലരും യോഗ്യരാണ്. എല്ലാവരും ബഹുമാനിക്കുന്ന ആളായതുകൊണ്ടും നായരായതിനാലുമാണ് രമേശ് ചെന്നിത്തലയെ എൻ എസ് എസ് ആസ്ഥാനത്തേക്ക് ക്ഷണിച്ചതെന്ന് അദ്ദേഹം കൂട്ടിച്ചേർത്തു.
എല്ലാവരും ബഹുമാനിക്കുന്നതും നായർ സമുദായത്തിലെ വ്യക്തിയായതും കൊണ്ടാണ് ചെന്നിത്തലയെ എൻ.എസ്.എസ് ആസ്ഥാനത്തേക്ക് ക്ഷണിച്ചത്. ഒരു കാലത്ത് എടുത്ത രാഷ്ട്രീയ നിലപാട് വിഡ്ഢിത്തരമാണെന്ന് മനസിലായെന്നും ജി.സുകുമാരൻ നായർ പറഞ്ഞു. ചെന്നിത്തല മാത്രം മുഖ്യമന്ത്രിയാകാൻ യോഗ്യതയുള്ള ആൾ എന്ന് താൻ പറഞ്ഞിട്ടില്ല. എന്നാൽ രമേശ് ചെന്നിത്തലയ്ക്കും മുഖ്യമന്ത്രിയാകാൻ യോഗ്യതയുണ്ട്. അതുകൊണ്ട് മറ്റുള്ളവർക്ക് മുഖ്യമന്ത്രിയാകാൻ യോഗ്യതയില്ല എന്ന് താൻ പറയില്ല എന്നും സുകുമാരൻ നായർ പറഞ്ഞു.
വർഷങ്ങൾക്ക് ശേഷം പിണക്കം മറന്ന് രമേശ് ചെന്നിത്തല ചങ്ങനാശേരി പെരുന്നയിലെ എൻ.എസ്.എസ് ആസ്ഥാനത്തെത്തിയിരുന്നു. മന്നം ജയന്തി ആഘോഷങ്ങളുടെ ഭാഗമായുള്ള പൊതുസമ്മേളനം ഉദ്ഘാടനം ചെയ്യാനായിരുന്നു 11 വർഷങ്ങൾക്ക് ശേഷം ചെന്നിത്തല പെരുന്നയിലെത്തിയത്. ഇത് വലിയ ചർച്ചയ്ക്ക് കാരണമായിരുന്നു. തിരഞ്‌ഢെടുപ്പിലേക്കുള്ള പിന്തുണ ഇപ്പോഴേ ഉറപ്പിക്കാനാണ് ചെന്നിത്തല എത്തിയതെന്നായിരുന്നു അഭ്യൂഹം.
