പാലക്കാട്; മലമ്പുഴ അണക്കെട്ടിനുസമീപം മഹാശിലായുഗ അവശിഷ്ടങ്ങൾ കണ്ടെത്തിയതായി ആർക്കിയോളജിക്കൽ സർവേ ഓഫ് ഇന്ത്യ. ഔദ്യോഗിക എക്സ് അക്കൗണ്ടിലൂടെയാണ് വിവരം പുറത്തുവിട്ടത്. 45 ഹെക്ടറിലായി 110 മഹാശിലാ(മെഗാലിത്തിക്) നിർമിതികളാണ് കണ്ടെത്തിയത്. മലമ്പുഴ ഡാമിലെ ദ്വീപുകൾ പോലുള്ള കുന്നുകളിലാണ് ശിലാ നിർമിതികൾ കണ്ടെത്തിയത്. സിസ്റ്റ് ഇനത്തിൽപ്പെട്ടവയാണ് മിക്ക മെഗാലിത്തുകളുമെന്ന് എഎസ്‌ഐ അറിയിച്ചു. ഇവ പ്രധാനമായും കൂറ്റൻ ഗ്രാനൈറ്റ് സ്ലാബുകളും പാറക്കല്ലുകളും ഉപയോഗിച്ചാണ് നിർമിച്ചിരിക്കുന്നത്, ചിലതിൽ ലാറ്ററൈറ്റ് കല്ലുകളും ഉൾപ്പെടുത്തിയിട്ടുണ്ട്.
കേരളത്തിലെ ആദ്യകാല ഇരുമ്പുയുഗ സമൂഹത്തെയും അവരുടെ വിശ്വാസ വ്യവസ്ഥയെയും കുറിച്ചുള്ള കൂടുതൽ ഉൾക്കാഴ്ചകൾ നൽകാൻ ഈ കണ്ടെത്തലിന് സാധിക്കുമെന്ന് ആർക്കിയോളജിക്കൽ സർവേ ഓഫ് ഇന്ത്യ പറയുന്നു.
എന്താണ് മെഗാലിത്ത്?
പുരാതനകാലങ്ങളിൽ സ്മാരകങ്ങൾ നിർമിക്കാനും ശവസംസ്‌കാരും നടത്താനും ഉപയോഗിക്കുന്ന വലിയ കല്ലുകളാണ് മെഗാലിത്ത്. ഒന്നോ ഒന്നിലധികം മെഗാലിത്തുകളോ ചേർത്തുവെച്ചാണ് സ്മാരകം നിർമിക്കുന്നത്.തൃശൂർ ജില്ലയിലെ ചിറമനങ്ങാടിലെ കുടക്കല്ല് പറമ്പ് ചരിത്രാതീതകാലത്തെ ഒരു മെഗാലിത്ത് ശവകൂടീരമാണ്. ഇവിടെ ചെറിയ ഒരു സ്ഥലത്ത് 69 മെഗാലിത്ത് സ്മാരകങ്ങളാണ് കണ്ടെത്തിയത്
