ഒരു കാലത്ത് ഇന്ത്യൻ ഫാസ്റ് ബോളിങ്ങിന്റെ പ്രതീക്ഷ എന്നൊക്കെ അറിയപ്പെട്ട ഉമ്രാൻ മാലിക്ക് എന്ന താരത്തെ ഓർക്കുന്നില്ലേ? ഇന്ത്യയിൽ അങ്ങനെ ഇങ്ങനെ ഒന്നും കാണാത്ത സ്പീഡ്സ്റ്റർ ബോളർമാരുടെ ലിസ്റ്റിൽ ഉൾപ്പെട്ട താരത്തിന്റെ ഉയർച്ചയും ശേഷമുള്ള താഴ്ചയും ഒരേ പോലെ ആയിരുന്നു. എന്തായാലും ശക്തമായ തിരിച്ചുവരവ് നടത്തുമെന്ന പ്രതീക്ഷയിലാണ് ഇപ്പോൾ താരം.
തന്റെ ആദ്യ ഇന്ത്യൻ പ്രീമിയർ ലീഗ് സീസണിൽ (ഐപിഎൽ) സൺറൈസേഴ്‌സ് ഹൈദരാബാദിനൊപ്പം (എസ്ആർഎച്ച്) ഉള്ള അവിസ്മരണീയമായ പ്രകടനത്തിന് ശേഷം മാലിക്കിന് ആ മികവ് കാണിക്കാനായില്ല. സ്ഥിരതയില്ലായ്മ അദ്ദേഹത്തെ ബാധിച്ചു. എന്നിരുന്നാലും, ഇപ്പോൾ നടക്കുന്ന സയ്യിദ് മുഷ്താഖ് അലി ട്രോഫിയിൽ ജമ്മു & കശ്മീരിനായി വലംകൈയ്യൻ പേസർ മികച്ച പ്രകടനം കാഴ്ചവെച്ചു. മഹാരാഷ്ട്രയ്ക്കും ഉത്തർപ്രദേശിനുമെതിരെ യഥാക്രമം 4-0-24-2 ഉം 4-0-37-3 ഉം എന്ന ബോളിങ് പ്രകടനം നടത്തി തിളങ്ങി.
150 കിലോമീറ്ററിൽ കൂടുതൽ വേഗതയിൽ പന്തെറിയുന്ന താരം ഒരിക്കൽക്കൂടി ഇന്ത്യൻ ജേഴ്സി ധരിക്കുന്നതിൽ ആത്മവിശ്വാസത്തിലാണ് ഇപ്പോൾ ഉള്ളത്. ബൗളർ തന്റെ ആവനാഴിയിൽ കൂടുതൽ അസ്ത്രങ്ങൾ ചേർത്തിട്ടുണ്ട്. “എനിക്ക് വിഷമമൊന്നുമില്ല, 150 ൽ പന്തെറിയുന്ന ഒരേയൊരു വ്യക്തി ഞാനായതിനാൽ ഞാൻ ഇന്ത്യൻ ടീമിലേക്ക് തിരിച്ചുവരും,” അദ്ദേഹം മാധ്യമങ്ങളോട് പറഞ്ഞു. ഞാൻ സ്ലോ ബോളിലും യോർക്കറിലും എല്ലാം പ്രവർത്തിക്കുന്നു. റെഡ്-ബോൾ ക്രിക്കറ്റിലും ഞാൻ കഠിനാധ്വാനം ചെയ്യുന്നു,” അദ്ദേഹം കൂട്ടിച്ചേർത്തു.
“ബാക്കി കാര്യങ്ങൾ സെലക്ടർമാരെ ആശ്രയിച്ചിരിക്കുന്നു. ഞാൻ ഇപ്പോൾ നന്നായി ചെയ്യുന്നു, ഇന്ത്യയ്ക്കായി കളിക്കുക എന്നതാണ് എന്റെ ലക്ഷ്യം. 150 ൽ പന്തെറിയുന്ന ഒരു ബൗളർ ഒരു രാജാവാണ്. എല്ലാ ബൗളർമാരും 150 കിലോമീറ്റർ വേഗതയിൽ പന്തെറിയുന്നില്ല. 150 കിലോമീറ്റർ വേഗതയിൽ പന്തെറിയാൻ ധൈര്യം ആവശ്യമാണ്, അഞ്ച് വർഷമായി ഞാൻ അത് ചെയ്യുന്നു,” അദ്ദേഹം ഉപസംഹരിച്ചു.
10 ഏകദിനങ്ങളിലും 9 ടി20 മത്സരങ്ങളിലും ഇന്ത്യക്കായി കളിച്ച താരം 24 വിക്കറ്റുകൾ നേടിയിട്ടുണ്ട്.
