ഭാരതീയ വ്യോമസേനയുടെ കരുത്തിന് മുന്നിൽ പാകിസ്താൻ വീണ്ടും മുട്ടുമടക്കുന്നു. 2025 മെയ് മാസത്തിൽ ഇന്ത്യൻ വ്യോമസേന നടത്തിയ ‘ഓപ്പറേഷൻ സിന്ദൂർ’ (Operation Sindoor) എന്ന മിന്നലാക്രമണത്തിൽ തകർന്ന പാകിസ്താനിലെ മുരീദ് (Murid) എയർബേസ് പൂർണ്ണമായും തകർന്നു എന്ന് സ്ഥിരീകരിക്കുന്ന സാറ്റലൈറ്റ് ദൃശ്യങ്ങൾ പുറത്തുവന്നു. ആക്രമണത്തിന് ശേഷം മാസങ്ങളോളം കെട്ടിടം നന്നാക്കാൻ പാക് സൈന്യം ശ്രമിച്ചെങ്കിലും, ഇന്ത്യൻ മിസൈലുകൾ ഏൽപ്പിച്ച ആഘാതത്തിൽ കെട്ടിടത്തിന്റെ അടിത്തറ ഇളകിയതോടെ അറ്റകുറ്റപ്പണികൾ പരാജയപ്പെടുകയായിരുന്നു. ഒടുവിൽ തകർന്ന കമാൻഡ് ആൻഡ് കൺട്രോൾ സെന്റർ പാകിസ്താൻ പൂർണ്ണമായും പൊളിച്ചുനീക്കി. ഉപഗ്രഹ ചിത്രങ്ങൾ വിശകലനം ചെയ്ത പ്രതിരോധ വിദഗ്ധൻ ഡാമിയൻ സൈമൺ ആണ് പാകിസ്താൻ്റെ ഈ ദയനീയാവസ്ഥ പുറംലോകത്തെ അറിയിച്ചത്.
മെയ് 10-ന് പുലർച്ചെ 2 മണിക്കും 5 മണിക്കും ഇടയിൽ ഇന്ത്യൻ വ്യോമസേന നടത്തിയ അതിശക്തമായ ആക്രമണത്തിൽ തകർന്ന പത്ത് പാക് താവളങ്ങളിൽ ഒന്നായിരുന്നു ചക്വാളിന് സമീപമുള്ള മുരീദ് എയർബേസ്. പാകിസ്താൻ്റെ ഡ്രോൺ (UAV) പ്രവർത്തനങ്ങളുടെ പ്രധാന കേന്ദ്രമായിരുന്നു ഇത്. ഇന്ത്യൻ അതിർത്തിയിലേക്ക് ഡ്രോണുകൾ അയച്ച് അസ്ഥിരതയുണ്ടാക്കാൻ ശ്രമിച്ച പാക് ബുദ്ധികേന്ദ്രത്തിനാണ് ഭാരതം അന്ന് മറുപടി നൽകിയത്. റഫാൽ യുദ്ധവിമാനങ്ങളിൽ നിന്ന് തൊടുത്തുവിട്ട അതിമാരകമായ സ്‌കാൽപ് (SCALP) മിസൈലുകളാണ് ഈ താവളത്തെ തകർത്തെറിഞ്ഞതെന്നാണ് സൂചന. കോൺക്രീറ്റ് പാളികൾ തുളച്ചുകയറി ഉള്ളിൽ സ്ഫോടനം നടത്തുന്ന ഈ മിസൈലിന്റെ പ്രഹരശേഷിയിൽ കെട്ടിടത്തിന്റെ ഉൾഭാഗം പൂർണ്ണമായും തകരുകയായിരുന്നു. ഡിസംബർ മാസത്തിൽ വലിയ പച്ച ടാർപ്പായകൾ ഉപയോഗിച്ച് തകർച്ച മറച്ചുവെക്കാൻ പാകിസ്താൻ ശ്രമിച്ചിരുന്നെങ്കിലും ഫെബ്രുവരി 28-ലെ പുതിയ ചിത്രങ്ങൾ കെട്ടിടം ഇല്ലാതായതായി സ്ഥിരീകരിക്കുന്നു.
ഭാരതത്തിന്റെ ആഭ്യന്തര കാര്യങ്ങളിൽ ഇടപെടാൻ ശ്രമിക്കുന്ന ശത്രു രാജ്യങ്ങൾക്ക് കൃത്യമായ താക്കീതാണ് ഈ ഓപ്പറേഷൻ നൽകിയത്. അതിർത്തി കടന്നുള്ള ഭീകരവാദത്തിന് താവളമൊരുക്കിയ പാക് സൈന്യത്തിന് നേരിട്ട് പ്രഹരമേൽപ്പിച്ചതോടെയാണ് അന്ന് പാകിസ്താൻ വെടിനിർത്തലിന് തയ്യാറായത്. അത്യന്തം അത്യാധുനികമായ ബങ്കർ ബസ്റ്റർ മിസൈലുകൾ ഉപയോഗിച്ച് ശത്രുവിന്റെ കമാൻഡ് സെന്ററുകൾ നിഷ്പ്രഭമാക്കാൻ ഭാരതത്തിന് കഴിയുമെന്ന് ഈ ദൃശ്യങ്ങൾ ഒരിക്കൽ കൂടി തെളിയിക്കുന്നു. മുരീദ് എയർബേസിലെ ഭൂഗർഭ താവളങ്ങളും ഇന്ത്യ തകർത്തിരുന്നു. തകർന്ന കെട്ടിടത്തിന്റെ അവശിഷ്ടങ്ങൾക്കിടയിൽ പാകിസ്താൻ ഉത്തരം കിട്ടാതെ നിൽക്കുമ്പോൾ, നവഭാരതത്തിന്റെ സൈനിക കരുത്ത് ലോകത്തിന് മുന്നിൽ തലയുയർത്തി നിൽക്കുകയാണ്.
