തിരുവനന്തപുരം : രാഷ്ട്രീയ പാർട്ടികൾക്ക് വിതരണം ചെയ്യാനുള്ള തിരഞ്ഞെടുപ്പ് കമ്മീഷന്റെ ഔദ്യോഗിക കത്തിൽ ബിജെപി സീൽ പതിച്ച സംഭവത്തിൽ, തിരഞ്ഞെടുപ്പ് വിഭാഗം അസിസ്റ്റന്റ് ജെയ്സിൽ പി. അസീസിനെ സസ്‌പെൻഡ് ചെയ്തു. നിലവിൽ പൊതു ഭരണ വകുപ്പിലെ അസിസ്റ്റന്റ് ആയ ജെയ്സിൽ പി. അസീസിനെ സസ്‌പെൻഡ് ചെയ്യാൻ ചീഫ് ഇലക്ടറൽ ഓഫീസർ ഡോ. രത്തൻ യു. കേൽക്കറാണ് ഉത്തരവിട്ടത്.
തിരഞ്ഞെടുപ്പ് കമ്മീഷന്റെ പ്രവർത്തന സ്വാതന്ത്ര്യത്തെയും നിഷ്പക്ഷതയെയും ചോദ്യം ചെയ്യുന്ന വിധത്തിലാണ് കത്തിൽ ബിജെപി സീൽ പ്രത്യക്ഷപ്പെട്ടതെന്ന് സസ്പെൻഷൻ ഉത്തരവിൽ ചീഫ് ഇലക്ടറൽ ഓഫീസർ വ്യക്തമാക്കി. പ്രാഥമിക അന്വേഷണത്തിന്റെ അടിസ്ഥാനത്തിൽ ആണ് ജെയ്സിൽ പി. അസീസിനെതിരെ നടപടി എടുത്തിരിക്കുന്നത്. പൊതുഭരണ വകുപ്പിൽ നിന്നുള്ള ജെയ്സിൽ പി. അസീസ് നിലവിൽ തിരഞ്ഞെടുപ്പ് (എക്‌സ്‌പെൻഡിച്ചർ & ഐടി) വിഭാഗത്തിൽ ജോലി ചെയ്യുകയായിരുന്നു. ഇത്തരമൊരു സംഭവം കമ്മീഷന്റെ പ്രവർത്തനങ്ങളെക്കുറിച്ച് ജനങ്ങളിൽ അവിശ്വാസം ഉണ്ടാക്കിയെന്ന് ഉത്തരവിൽ വ്യക്തമാക്കുന്നു.
