സാമ്പത്തിക പ്രതിസന്ധിയിൽ വലയുന്ന പാകിസ്ഥാന്റെ വിദേശ കടം കഴിഞ്ഞ പത്ത് വർഷത്തിനിടെ ഇരട്ടിയായി ഉയർന്നതായി റിപ്പോർട്ട്. ലോകബാങ്ക് പുറത്തുവിട്ട ഇന്റർനാഷണൽ ഡെബ്റ്റ് റിപ്പോർട്ട് 2026 (International Debt Report 2026) പ്രകാരം, പാകിസ്ഥാന്റെ വിദേശ കടം 135.1 ബില്യൺ ഡോളറായി (ഏകദേശം 13,510 കോടി ഡോളർ) വർദ്ധിച്ചു. 2015-ൽ 68.67 ബില്യൺ ഡോളറായിരുന്ന കട ബാധ്യതയിലാണ് പത്തു വർഷത്തിനുള്ളിൽ 97 ശതമാനത്തിന്റെ ഭീമമായ വർദ്ധനവ് രേഖപ്പെടുത്തിയത്.
പാകിസ്ഥാന് ഏറ്റവും കൂടുതൽ കടം നൽകിയ ഒറ്റ രാജ്യം ചൈനയാണ്. 22.42 ബില്യൺ ഡോളറാണ് ചൈനയ്ക്ക് മാത്രം പാകിസ്ഥാൻ തിരിച്ചടയ്ക്കാനുള്ളത്. അന്താരാഷ്ട്ര ധനകാര്യ സ്ഥാപനങ്ങളായ ലോകബാങ്കിന്റെ ഐ.ഡി.എ (19.21 ബില്യൺ ഡോളർ), ഏഷ്യൻ ഡെവലപ്‌മെന്റ് ബാങ്ക് (16.83 ബില്യൺ ഡോളർ) എന്നിവയേക്കാൾ ഉയർന്ന തുകയാണിത്. ചൈനയിൽ നിന്നുള്ള വായ്പകൾക്ക് പുറമെ സ്വകാര്യ ഏജൻസികളിൽ നിന്ന് ഉയർന്ന പലിശ നിരക്കിൽ (8.6%) എടുത്ത ഹ്രസ്വകാല വായ്പകളും പാകിസ്ഥാന് വൻ സാമ്പത്തിക ബാധ്യത വരുത്തിവെക്കുന്നുണ്ട്.
അതേസമയം, തിരിച്ചടയ്ക്കേണ്ട 2 ബില്യൺ ഡോളറിന്റെ ചൈനീസ് വായ്പകളുടെ കാലാവധി നീട്ടിനൽകിയതും അന്താരാഷ്ട്ര നാണയ നിധി (IMF) നൽകിയ 2.3 ബില്യൺ ഡോളറിന്റെ അടിയന്തര ധനസഹായവുമാണ് നിലവിൽ രാജ്യത്തിന് ചെറിയൊരു ആശ്വാസം നൽകുന്നത്. എന്നാൽ, സാമ്പത്തിക പ്രതിസന്ധിയും പണപ്പെരുപ്പവും കാരണം ജനങ്ങൾ ദുരിതത്തിലായ പാകിസ്ഥാന് ഈ ഭീമമായ കടബാധ്യതകൾ വലിയ വെല്ലുവിളിയാണ് സൃഷ്ടിക്കുന്നത്.
