ഇന്ത്യൻ കപ്പലുകൾക്ക് ടോൾ ഏർപ്പെടുത്തിയിട്ടില്ല, വേണമെങ്കിൽ സർക്കാരിനോട് ചോദിക്കാം; യുഎസ് ആരോപണം തള്ളി ഇറാൻ!

ഹോർമുസ് കടലിടുക്കിലൂടെ സഞ്ചരിക്കുന്ന ഇന്ത്യൻ കപ്പലുകളിൽ നിന്ന് ഇറാൻ ടോൾ ഈടാക്കുന്നു എന്ന വാർത്തകൾ നിഷേധിച്ച് ഇന്ത്യയിലെ ഇറാൻ സ്ഥാനപതി മുഹമ്മദ് ഫതാലി. പശ്ചിമേഷ്യയിൽ സംഘർഷം രൂക്ഷമാകുന്നതിനിടെ ഹോർമുസ് കടലിടുക്ക് കടക്കാൻ ഇന്ത്യൻ കപ്പലുകൾ പണം നൽകിയെന്ന അമേരിക്കൻ ആരോപണങ്ങളെ അദ്ദേഹം പൂർണ്ണമായും തള്ളിക്കളഞ്ഞു. ഇക്കാര്യത്തിൽ എന്തെങ്കിലും സംശയമുണ്ടെങ്കിൽ ഇന്ത്യൻ സർക്കാരിനോട് തന്നെ ചോദിക്കാമെന്നും ന്യൂഡൽഹിയിലെ ഇറാൻ എംബസിയിൽ നടത്തിയ വാർത്താ സമ്മേളനത്തിൽ ഫതാലി വ്യക്തമാക്കി. ഇന്ത്യയും ഇറാനും തമ്മിലുള്ള ശക്തമായ നയതന്ത്ര ബന്ധത്തിന്റെ പശ്ചാത്തലത്തിൽ ഇത്തരമൊരു നടപടി ഉണ്ടാകില്ലെന്ന് അദ്ദേഹം ആവർത്തിച്ചു.

ഇറാൻ യുദ്ധം പൊട്ടിപ്പുറപ്പെട്ടതിന് പിന്നാലെ തടസ്സപ്പെട്ട ഒൻപത് എൽപിജി കപ്പലുകൾ വിട്ടുകിട്ടാൻ ഇന്ത്യ ടോൾ നൽകിയെന്ന റിപ്പോർട്ടുകൾ ഇന്ത്യൻ ഉദ്യോഗസ്ഥരും നേരത്തെ തന്നെ നിഷേധിച്ചിരുന്നു. നിലവിൽ ഏകദേശം 15 ഇന്ത്യൻ കപ്പലുകൾ പേർഷ്യൻ ഗൾഫിൽ കുടുങ്ങിക്കിടക്കുന്നുണ്ടെന്നാണ് വിവരം. ഈ പ്രതിസന്ധി ഘട്ടത്തിലും ഇന്ത്യ ഇറാനെ സംബന്ധിച്ച് വിശ്വസ്തനായ പങ്കാളിയാണെന്ന് ഫതാലി വിശേഷിപ്പിച്ചു. “ഈ പ്രയാസകരമായ സമയത്തും ഇന്ത്യയുമായി ഞങ്ങൾക്ക് നല്ല ബന്ധമാണുള്ളത്. ഇന്ത്യയും ഇറാനും പൊതുവായ താത്പര്യങ്ങളും ഒരേ വിധിയുമാണ് പങ്കിടുന്നത്,” അദ്ദേഹം പറഞ്ഞു. ഇറാന്റെ വിദേശകാര്യ മന്ത്രി സൗഹൃദ രാജ്യങ്ങളുടെ പട്ടികയിലാണ് ഇന്ത്യയെ ഉൾപ്പെടുത്തിയിരിക്കുന്നതെന്നും അദ്ദേഹം കൂട്ടിച്ചേർത്തു. ഇന്ത്യയുടെ ക്രൂഡ് ഓയിൽ, എൽപിജി ഇറക്കുമതിയുടെ പകുതിയോളം ഹോർമുസ് കടലിടുക്ക് വഴിയാണ് കടന്നുപോകുന്നത് എന്നതിനാൽ ഈ പാത ഇന്ത്യയെ സംബന്ധിച്ച് അതീവ തന്ത്രപ്രധാനമാണ്.

അതേസമയം, അമേരിക്കയുമായി വീണ്ടും ചർച്ചയ്ക്ക് ഇറാൻ തയ്യാറാണെന്ന സൂചനയും സ്ഥാനപതി നൽകി. എന്നാൽ വാഷിംഗ്ടൺ നിയമവിരുദ്ധമായ ആവശ്യങ്ങളിൽ നിന്ന് പിന്മാറണമെന്ന് അദ്ദേഹം ആവശ്യപ്പെട്ടു. ഇസ്‌ലാമാബാദിൽ നടന്ന ചർച്ചകൾ പരാജയപ്പെട്ടത് അമേരിക്കയുടെ അസ്വീകാര്യമായ നിബന്ധനകൾ മൂലമാണെന്നും ഇറാൻ കുറ്റപ്പെടുത്തി. ഇറാൻ തുറമുഖങ്ങൾ ഉപരോധിക്കുമെന്ന ഡൊണാൾഡ് ട്രംപിന്റെ ഭീഷണിക്ക്, ഇറാന്റെ സൈനിക ശേഷി എന്താണെന്ന് വാഷിംഗ്ടണിന് കൃത്യമായി അറിയാമെന്നായിരുന്നു അദ്ദേഹത്തിന്റെ മറുപടി. ഹോർമുസ് കടലിടുക്ക് ഇറാന്റെ സമുദ്രാതിർത്തിക്കുള്ളിലാണെന്നും അദ്ദേഹം ഓർമ്മിപ്പിച്ചു. ലോകത്തെ ഏറ്റവും പ്രധാനപ്പെട്ട എണ്ണക്കപ്പൽ പാതയെച്ചൊല്ലിയുള്ള തർക്കം മുറുകുന്നത് അന്താരാഷ്ട്ര തലത്തിൽ വലിയ ആശങ്കയുണ്ടാക്കുന്നുണ്ട്.