മാലിദ്വീപിലെ ആഴക്കടലിൽ അടിത്തട്ടിലെ ഗുഹകൾ പര്യവേക്ഷണം ചെയ്യാനിറങ്ങിയ വിനോദസഞ്ചാരികളായ അഞ്ച് ഇറ്റാലിയൻ ഡൈവർമാർക്ക് ദാരുണാന്ത്യം. മാലിദ്വീപിന്റെ ചരിത്രത്തിലെ തന്നെ ഏറ്റവും വലിയ ഡൈവിങ് ദുരന്തമെന്നാണ് അധികൃതർ ഈ സംഭവത്തെ വിശേഷിപ്പിച്ചത്. മാലിദ്വീപിലെ പ്രശസ്തമായ വാവു അറ്റോളിലെ അതീവ സങ്കീർണ്ണമായ കടലിനടിയിലെ ഗുഹാശൃംഖലയിലാണ് അപകടം സംഭവിച്ചത്. ഏകദേശം 50 മീറ്ററോളം (160 അടിയിലേറെ) ആഴത്തിലുള്ള ഗുഹയിലേക്ക് ഇറങ്ങിയ അഞ്ചംഗ സംഘം പിന്നീട് മുകളിലേക്ക് തിരിച്ചെത്തിയില്ല. കടലിലെ കടുത്ത മോശം കാലാവസ്ഥയും ശക്തമായ അടിയൊഴുക്കുകളും രക്ഷാപ്രവർത്തനത്തെ വൻതോതിൽ ബാധിക്കുന്നുണ്ട്. നിലവിൽ ഇന്ത്യൻ മഹാസമുദ്രത്തിന്റെ അടിത്തട്ടിലെ ഈ കനത്ത ഇരുട്ടുമൂടിയ ഗുഹകളിൽ നിന്ന് ഒരാളുടെ മൃതദേഹം മാത്രമാണ് രക്ഷാപ്രവർത്തകർക്ക് പുറത്തെടുക്കാൻ സാധിച്ചിട്ടുള്ളത്. ബാക്കിയുള്ള നാല് പേർക്കായി കടലിനടിൽ അത്യാധുനിക സജ്ജീകരണങ്ങളോടെ തിരച്ചിൽ തുടരുകയാണ്.
അതീവ സങ്കീർണ്ണവും സാങ്കേതിക വൈദഗ്ധ്യം ആവശ്യമുള്ളതുമായ ഡൈവിങ്ങിനിടെയാണ് ഇവർക്ക് അപകടം സംഭവിച്ചതെന്ന് അന്വേഷണ ഉദ്യോഗസ്ഥർ വ്യക്തമാക്കി. കനത്ത ഇരുട്ടായതിനാൽ ഗുഹയ്ക്കുള്ളിലെ കാഴ്ചപരിധി കുറഞ്ഞതും, ദിശാബോധം നഷ്ടപ്പെട്ടതുമാകാം അപകടത്തിന് കാരണമെന്നാണ് പ്രാഥമിക നിഗമനം. കൂടാതെ ഇത്രയും ആഴത്തിൽ വെച്ച് ഓക്സിജൻ സിലിണ്ടറിലെ വാതകവ്യതിയാനം മൂലമുണ്ടാകുന്ന ‘ഓക്സിജൻ ടോക്സിസിറ്റി’ (Oxygen Toxicity) എന്ന ഗുരുതരമായ ശാരീരികാവസ്ഥ ഇവർക്ക് നേരിടേണ്ടി വന്നിട്ടുണ്ടാകാമെന്നും, അല്ലെങ്കിൽ ഡൈവിങ് ഉപകരണങ്ങളിലെ സാങ്കേതിക തകരാറാകാം ദുരന്തത്തിന് വഴിവെച്ചതെന്നും വിദഗ്ധർ സംശയിക്കുന്നുണ്ട്. സംഭവത്തെക്കുറിച്ച് മാലദ്വീപ് കോസ്റ്റ് ഗാർഡും പോലീസും വിശദമായ അന്വേഷണം ആരംഭിച്ചിട്ടുണ്ട്. വിനോദസഞ്ചാരികളുടെ പറുദീസയായ മാലിദ്വീപിൽ നിന്നുള്ള ഈ വൻ ദുരന്തവാർത്ത ആഗോളതലത്തിലും സോഷ്യൽ മീഡിയയിലും വലിയ ഞെട്ടലോടെയാണ് ജനങ്ങൾ പങ്കുവെക്കുന്നത്.
